Fermerë të zonës së Myzeqesë nga Lushnja e Fieri kanë protestuar sot kundër paketës së re fiskale.
Protesta shënoi incidente, pasi protestuesit u përplasën me policinë ndërsa bllokuan autostradën, në vendin e njohur si rrethrrotullimi i Plugut. Rreth 15 persona u shoqëruan në komisariat për këtë arsye.
Kjo protestë u organizua nga tre shoqata, Këshilli i Agrobiznesit shqiptar, Sindikata e Fermerëve të Bashkuar dhe Shoqata e Eksportuesve të frutave dhe perimeve, të cilat artikuluan 6 kërkesa drejtuar qeverisë.
Ata janë kundër paketës fiskale dhe propozojnë heqjen e subvencionit për sipërfaqen e tokës dhe vendosjen e subvencionit të fermerit për njësi prodhimi me vlerë 10 lekë për kg.
“Propozimet tona janë të argumentuara dhe synojnë të frenojnë rënien e bujqësisë që tashmë është pasqyruar edhe në shifrat e INSTAT. Ky nuk është instrument lëmoshe, as mbështetje sociale, por një mënyrë për të formalizuar sektorin që është 90% informal. Ky propozim stimulon suksesin në bujqësi, sepse i shkon atij që ka prodhuar standard për treg”, tha kreu i Sindikatës së Fermerëve të Bashkuar, Eduard Sharka.
Kërkesa tjetër, sipas tij, “është stimulimi i eksportuesve drejtpërdrejt nga Drejtoria Përgjithshme Doganave për çdo kilogramë të eksportuar me 3 lekë”.
“Kërkesa e tretë është barazimi i shkallës së TVSH-së me shitjen në atë në blerje. Kemi tre vjet që e kemi 0 në blerje dhe 20 në shitje, kjo ka ulur interesin për produktin vendas. Kërkesa e katërt, është krijimin e një Agjencie orientimi që mos të mbjellin kuturu, por të kemi një laborator të akredituar, për të shmangur krizat e tregut dhe hedhjen e prodhimeve”, tha ai.
Në këtë protestë morën pjesë fermerë, grumbullues dhe eksportues, të cilët shprehen se do të përshkallëzojnë protestën, nëse qeveria nuk merr parasysh kërkesat e tyre ekonomike.
Kërkesat e fermerëve
1. Subvencionim direkt i fermerit me 10 lekë për kg
2. Barazim i TVSH në shitje dhe blerje
3. Pezullim i TVSH për plehrat kimike, inputet bujqësore
3. Subvencionim 3 lekë për eksportuesit
5. Laboratorë analizash për tokat dhe perimet
6. Garanci për paget e faturave nga grumbulluesit
