Ish kryeministri, Sali Berisha u shpreh i bindur se zgjedhjet për kryetarin e PD do të bëhen.
Madje zoti Berisha u shpreh se 90% e anëtarësisë do t’i kërkojnë që të kandidojë.
“Zgjedhjet për kryetar do bëhen. Ju më thoni mua se do bënit mirë se meqë kandidimi yt automatikisht të bën kryetar. Që të marr unë një vendim të tillë, duhet të pyes gjithë anëtarësinë e PD-së dhe unë të garantoj që po t’i pyes 90% e tyre do thotë “të kandidosh.” Atëherë më thoni ju mua? Çfarë do të bëj unë tani?”, tha Berisha.
Gazetari Neritan Sejamini ju përgjigj që mos kandidojë. Ndërsa Berisha, i ftuar në Euronews u shpreh se nëse nuk kandidon nuk është njeri politik.
“Pse e mbështesin Sali Berishën? Ky është një rikthim, rikthimet në histori janë gjëra të rralla por kanë ndodhur. Faktikisht rikthimet më shumë kanë ndodhur në të djathtën”, tha Berisha.
Berisha u shpreh i gatshëm të shkojë në Prokurori nëse thirret si person që është në dijeni të fakteve, për përplasjet para selisë së PD-së më 8 janar.
“Që nesër. Nuk kam asnjë kundërshtim”, tha Berisha.
“Unë për hir të qëndrimit tim ndaj ligjit do të shkoj pa diskutim dhe do të them fjalët e mia”, shtoi ish-kryeministri i ftuar në Euronews.
Kryedemokrati Lulzim Basha dhe ish-lideri Sali Berisha do të merren në pyetje në lidhje me protestën e 8 janarit. Për protestën e mbajtur përpara selisë blu, policia deri më tani ka shoqëruar 34 persona për incidentet e shkaktuara. Ndërsa penalisht u proceduan Gazment Bardhi dhe Flamur Noka.
