Mbretëresha Elizabeth e Mbretërisë së Bashkuar ia ka hequr titujt dhe mbrojtjen ushtarake princit Andrew, ka njoftuar Pallati Mbretëror. Lëvizja vjen pasi një gjykatë amerikane dha dritën e gjelbër që djali i saj të përballet me padi civile për sulm seksual.
Pallati mbretëror ka njoftuar se “me aprovimin dhe pajtimin e Mbretëreshës, rolet ushtarake dhe patronazhet mbretërore të Dukës së Yorkut janë kthyer te Mbretëresha”.
Ai s’pritet të marrë asnjë detyrë publike dhe do të mbrohet në gjykatë si qytetar privat.
Lëvizja vjen pak orë pasi rreth 150 veteranë ushtarakë i kërkuan Mbretëreshës ta largojë nga rolet e tij të nderit në ushtri në diçka që e cilësuan si “të padenjë për Mbretërinë”. Pallati më herët kishte refuzuar të komentonte çështjen.
