Presidenti i Turqisë, Recep Tayyip Erdogan deklaroi sot se Turqia do të vijojë të qëndrojë përkrah Shqipërisë duke e mbështetur atë në çdo sfidë të saj.
Gjatë vizitës në Kurbin, në lagjen e rilindur pas tërmetit, e cila u rindërtua nën kujdesin e posaçëm të tij, Erdogan tha se “duke qenë një popull i një vendi që ka përjetuar dhimbje të ngjashme shumë herë më parë, tërmetet e ndodhura në Shqipëri na lënduan zemrat tona, njëlloj si zemrat e popullit shqiptar”.
“Jam i lumtur që ndodhem këtu, me ju dhe jam bërë pjesë e këtyre emocioneve dhe entuziazmit tuaj. Gëzimi i Shqipërisë është gëzimi ynë dhe hidhërimi i Shqipërisë është hidhërimi ynë. Kështu që mirëqenien dhe paqen tuaj e konsiderojmë të njëjtë si tonën”, tha Erdogan.
Presidenti turk theksoi se menjëherë pas tërmetit ishte angazhuar edhe vet personalisht për t’ju gjendur pranë popullit shqiptar.
”Sapo morëm lajmin e hidhur për tërmetin jemi vënë në lëvizje për të ndarë dhimbjen e njerëzve të zonës së prekur nga tërmeti për tu shëruar sadopak plagët e tyre. Ne si shtet duke u mobilizuar me mundësitë tona ju erdhëm në ndihmë. Siç edhe e theksoi miku im Rama: Vëllai i qëndron pranë vëllait kur ka nevojë e jo kur thirret. Ne menjëherë kemi dërguar materialet, pajisjet dhe ekipet teknike. Duke qenë në kontakt të vazhdueshëm me mikun tim kryeministrin Rama, kemi bërë të mundur ndjekjen nga afër të punimeve që sapo kishin filluar. Unë personalisht jam aktivizuar e marrë inisiativë që gjatë këtij procesi ti vinim në ndihmë Shqipërisë nisëm kontaktet me komunitetin ndërkombëtar dhe Organizatën e bashkëpunimit Islamike. Fakti që Turqia ishte një nga shtetet e para që i erdhi në ndihmë Shqipërisë është një dëshmi e qartë e këtij solidariteti të fortë mes nesh .
Për të lehtësuar sadopak dhimbjen e barrën e atyre familjeve të prekura nga tërmeti, Erdogan tha se u nënshkrua memorandum i mirëkuptimit me kryeministrin Rama përmes së cilit Turqia u angazhua që shtëpitë e rrënuara të rindërtoheshin nga zero.
“Në muajin korrik të vitit 2020 sapo nënshkruam memorandumin nisëm ndërtimin e kantierit edhe pse kishte shpërthyer pandemia. Para 13 muajsh bëmë ceremoninë e hedhjes së themeleve të banesave. Dhe sot po i dorëzojmë 522 banesa me një vlerë afërsisht 42 milionë euro. T’i gëzoni këto banesa”, tha Erdogan./ATSH/
