Sekretari i Shtetit i ShBA-së, Antony Blinken, tha të mërkurën gjatë vizitës në Kiev se grumbullimi i trupave ruse afër kufirit të Ukrainës nënkupton se presidenti rus, Vladimir Putin, mund të japë urdhër për sulm ndaj Ukrainës për një kohë shumë të shkurtër.
Kryediplomati amerikan tha se shpreson fuqishëm se Rusia mund t’i përmbahet rrugës diplomatike e paqësore, kur ai të takohet me homologun rus, Sergei Lavrov, këtë javë në Gjenevë të Zvicrës për më shumë bisedime për uljen e tensioneve rreth Ukrainës.
“E dimë se ka plane për ta rritur atë forcë (ruse) edhe më shumë për një kohë shumë të shkurtër dhe kjo ia jep kapacitetin Presidentit Putin, gjithashtu për një kohë shumë të shkurtër, që të ndërmarrë veprime të mëtejme agresive kundër Ukrainës”, u tha Blinkeni diplomatëve në ambasadën e ShBA-së në Kiev.
Të mërkurën, sekretari Blinken do të takohet në Kiev me Presidentin e Ukrainës, Volodymyr Zelenskiy, dhe homologun e tij ukrainas, Dmytro Kuleba. Ai më pas do të takohet në Berlin me homologen gjermane, Annalena Baerbock, dhe më vonë me Katërshen Transatlantike, grup i përbërë nga ShBA-ja, Britania, Franca dhe Gjermania.
Blinkeni më pas do të takohet me homologun rus, Sergei Lavrov, të premten në Gjenevë të Zvicrës për të kërkuar rrugëdalje diplomatike me Moskën, tha një zyrtar i lartë amerikan.
