Ambasadorja e SHBA në Shqipëri, Yuri Kim ka marrë sot pjesë në aktivitetin e organizuar nga departamenti i Historisë, pranë Fakultetit Histori-Filologji i Universitetit të Tiranës.
Lajmi bëhet i ditur nga departamenti i Historisë pranë Fakultetit të Historisë e Filologjisë, UT, i cili njofton se sot patën një mike të veçantë dhe të nderuar, Ambasadoren e SHBA në Shqipëri, Yuri Kim.
Demokracia i përket qytetarëve! Ky ishte një ndër argumentet kryesorë mbi të cilin u zhvillua diskutimi i sotshëm me ambasadoren Kim, që kishte në fokus të tij, 100-vjetorin e marrëdhënieve diplomatike Shqipëri-SHBA.
Ambasadorja Kim u ndal konkretisht në shtjellimin e marrëdhënieve SHBA-Shqipëri nga këndvështrimi i forcimit të demokracisë, dialogut, aleancës dhe sigurisë kombëtare të Shqipërisë në kuadër dhe të bashkëpunimit dypalësh në NATO, korrupsionit dhe forcimit të klimës së biznesit dhe ekonomisë në Shqipëri.
Ambasadorja theksoi në fjalën e saj, por edhe në përgjigje të pyetjeve të studentëve mbi situatën politike dhe lidhjet Shqipëri-SHBA, që forcimi i demokracisë dhe ushtrimi i të drejtave të qytetarëve në demokraci janë të drejta ekskluzive të qytetarëve dhe ata që janë në pushtet kanë përgjegjësinë më të madhe për të garantuar respektimin e këtyre të drejtave.
“Ne demokraci çdo qytetar është i barabartë para ligjit, dhe askush nuk është mbi të. Korrupsioni duhet goditur. Qytetarët shqiptarë kërkojnë shanse të barabarta. Janë qytetarët shqiptarë, ata që duhet të kërkojnë të drejtat e tyre dhe të mos lejojnë cënimin e lirive të tyre. Ky është vendi juaj, në të cilin ju do të jetoni, dhe do të projektoni të ardhmen tuaj. Nëse dikush vjen tek ju për t’ju shitur votën, mos e votoni! Më thjeshtë se kaq! Demokracia i përket qytetarëve”, u shprehet Kim./ATSH/
