Sipas raportit të “Sky News”, një burg në Afganistanin perëndimor po mban ish-punonjës të Qeverisë, si dhe fëmijë për krime të vogla. Burgu i Heratit mbikëqyret nga zyrtari taleban, Mohammad Nabi Khalil, i cili i dha leje transmetuesit britanik për t’i vizituar dhe folur me të burgosurit.
Ekipit të xhirimeve iu dha qasja nga talebanët ngaqë donin të tregonin se sa mirë ndihen kur e kanë sistemin e drejtësisë në dorë – mirëpo teksa qasja iu dha, ata ishin të shoqëruar nga guvernatori dhe persona të armatosur gjatë gjithë vizitës. Qelitë e burgut janë të mbushura plot, 40 burra në një dhomë, shumë prej të cilëve të akuzuar për krime të tilla si vjedhja, tradhtia bashkëshortore dhe mospagimi i borxheve.
Ata pretendojnë se shumicës së tyre nuk u janë mbajtur procese gjyqësore për shkak se sistemi gjyqësor i Sheriatit u krijua vetëm një muaj më parë, ka bërë të ditur guvernatori për “Sky News”. Në një qeli tjetër shihet qartazi se të drejtat e njeriut po shpërfillen. Njëri prej tinejxherëve ka treguar se u fut në qeli për vjedhjen e një biçiklete. Raportet po ashtu bëjnë të ditur se ish-guvernatorja e burgut të grave të Heratit është zhdukur para katër muajsh.
Guvernatori i burgut taleban beson që ajo “ka shkuar jashtë vendit” dhe se ishte e korruptuar – mirëpo burri i saj beson në diçka tjetër, duke treguar për “Sky News” se talebanët mund të kenë gisht në zhdukjen e saj.
