Presidenti i Ukrainës, Volodymyr Zelensky tha për BBC se vendi i tij nuk ka rrugë tjetër përveç anëtarësimit në NATO. Ai tha se anëtarësimi në NATO është një garanci për sigurinë e vendit të tij, duke përjashtuar çdo kompromis tjetër.
I pyetur nëse Kievi është gati të heqë dorë nga ambicia për anëtarësim në aleancën ushtarake perëndimore, ai tha: “Nuk është ambicia e Ukrainës. Ne kemi humbur 15 mijë njerëz. Nuk është një ambicie. Është jeta jonë”.
Sipas tij, NATO është garancia që vendi të mos humbasë pavarësinë.
“Nuk është për NATO-n. Është për të ardhmen e popullit tonë. ne po flasim për pavarësinë tonë. Kjo është e gjitha. Ne kemi vendosur se çfarë duam dhe çfarë do të bëjmë në të ardhmen”.
Rusia ka bërë presion ndaj SHBA dhe NATO që të heqin dorë nga një anëtarësim i mundshëm i Ukrainës në aleancën e Atlantikut të Veriut. Presidenti ukrainas bëri edhe të tjera komente të forta për BBC. Ai tha se disa vende të BE janë duke luajtur në krah të Rusisë. Sipas tij, kjo është diçka e gabuar.
Duke iu përgjigjur interesit të gazetares së BBC, Zelensky akuzon disa vende europiane se po luajnë me Rusinë, duke bërë presion për ta mbajtur Ukrainën jashtë NATO-s.
“Ne nuk mund t’i mbyllim sytë… dhe të themi se është vetëm Rusia që nuk na do atje. Nuk është e vërtetë. Disa vende të BE-së luajnë së bashku me Rusinë… gjë që është e gabuar”.
Duke pranuar se rruga drejt anëtarësimit në NATO dhe BE do të ishte e gjatë, ai thekson se për të si president gjëja më e rëndësishme në këtë rrugë është të mos humbasë vendin e tij.
