Sanksionet e reja për Rusinë duhet të jenë vërtet të dhimbshme. Kështu u shpreh presidenti Volodymyr Zelensky në një videomesazh në ditën e 56 të luftës në Ukrainë. Pas takimit me presidentin e Këshillit Europian, Charles Mishel, i cili vizitoi të mërkurën Kievin, Zelensky tha se Bashkimi Europian po planifikonte një paketë të 6 sanksionesh ndaj Moskës.
“Po punojmë për t’i bërë vërtet të dhimbshme sanksionet për makinerinë ushtarake të Moskës dhe Rusinë si të tërë. Në veçanti, sanksionet do të parashikojnë kufizime në sektorin energjetik, bankar të eksporteve, importeve dhe transportit”, tha Zelensky.
Presidenti ukrainas përsëriti thirrjen për embargo të plotë të naftës ruse. Gjermania, një prej vendeve më skeptike sa i përket ndërmarrjes së një hapi të tilla, tha se do të heqë dorë sa më shpejt të jetë e mundur nga varësia e energjisë ruse, por sipas ministrit të Financave, kjo do të kërkonte kohë. Ndryshe u shpreh më herët ministrja e Jashtme, Analena Baerbock, që tha se Gjermania do t’i jepte fund importit të naftës ruse në fund të vitit.
Thirrja për më shumë sanksione ndaj Moskës, vjen ndërsa ushtria e Putinit vijon ofensivën për pushtimin e rajonit të Donbas. Megjithatë, ekspertët amerikanë thonë se deri më tani, forcat ruse nuk kanë siguruar ndonjë fitore të rëndësishme e as nuk kanë demonstruar aftësi të reja për operacione të suksesshme.
Rusia po përpiqet dëshpërimisht të demonstrojë sukses të rëndësishëm në operacionin në Ukrainë, në prag të një parade më 9 maj, kur shënon fitoren ndaj nazizmit. Në një deklaratë për agjencinë e lajmeve TASS, një zyrtar i lartë i ministrisë së Jashtme në Moskë tha se operacioni ushtarak do të mbyllet kur NATO të mos e përdorë më territorin ukrainas për të kërcënuar Rusinë.
