Shtabi i Përgjithshëm i Forcave të Armatosura të Ukrainës, ka urdhëruar ushtarët që ishin “strehuar” në fabrikën e çelikut Azovstal në Mariupol, që të dorëzohen.
Pas më shumë se dy muajsh, dhjetëra luftëtarë ukrainas janë dorëzuar te trupat ruse që kishin rrethuar Azovstalin në Mariupol.
Ministria ruse e Mbrojtjes, ka njoftuar se 265 ushtarë ukrainas janë dorëzuar nga fabrika Azovstal në qytetin port Mariupol. Mbi 50 prej tyre janë të plagosur rëndë, të cilët janë dërguar në spitalin e qytetit Novoazovsk.
Madje janë publikuar pamjet e para të filmuara nga ajri me dron, ku shihet sesi transportohen deri te autobusët me barela ushtarët e plagosur ukrainas.
Në anën tjetër raportohet se të paktën shtatë autobusë me ushtarë ukrainas, janë larguar nga Azovstali, raporton Reuters.
