Ish-kryeministri i Kosovës, Avdullah Hoti, aktualisht deputet i Kuvendit të Kosovës, ka bërë një krahasim të pritjes në Shtetet e Bashkuara të Amerikës të delegacionit nga Maqedonia e Veriut dhe Qeverisë së Kosovës.
Hoti në një postim në Facebook shkruan se Maqedonia e Veriut po diskuton me partneritetin strategjik me ShBA dhe kjo është e rëndësishme për gjithë rajonin.
Ai më tej shkruan se Qeveria e Kosovës e neglizhon Marrëveshjen e Uashingtonin të 4 shtatorit 2020, që është e natyrës së partneritetit strategjik mes Kosovës dhe ShBA-së.
Lexoni të plotë postimin e Hotit në Facebook:
Maqedonia e Veriut diskuton partneritetin strategjik me ShBA. Kjo është e rëndësishme për gjithë rajonin. E përgëzoj Ministrin e Jashtëm të Maqedonisë së Veriut për këtë arritje.
Ndërkaq, Qeveria e Kosovës e neglizhon Marrëveshjen e Uashingtonin të 4 shtatorit 2020, që është e natyrës së partneritetit strategjik mes Kosovës dhe ShBA-së.
Pyetjet themelore janë:
Pse po neglizhohet kjo marrëveshje?
Pse po neglizhohet studimi i fizibilitetit për të lidhur Prishtinën me hekurudhë në Portin e Adriatikut?
Pse po neglizhohet mundësia për qasje në financim për ndërmarrje të vogla dhe të mesme në tregjet financiare amerikane?
Pse po neglizhohet mundësia për projekte bilaterale?
Pse po neglizhohet zbatimi i Marrëveshjes Kosovë-ShBA për Insentiva në Investime, e nënshkruar më 31 dhjetor 2020 nga Qeveria Hoti?
Pse u shty për më shumë se një vit marrëveshja me MCC për energji, ku përfshihej rrjeti i gazit dhe bateritë për ruajtje të energjisë, e në fund prapë u pajtuan për bateritë?
Në ditën në vijim do t’i publikoj të gjitha marrëveshjet e nënshkruara nga Qeveria Hoti me ShBA, të cilat po neglizhohen, si dhe pasojat për Kosovën.
