Kolegët republikanë të ish-presidentit amerikan Donald Trump reaguan me zemërim dhe kërkuan llogari për kontrollin e FBI-së në banesën e tij në Mar Al Lago, të Floridas. Edhe pse nuk ka një reagim zyrtar nga Byroja Federale e Hetimeve dhe Departamenti i Drejtësisë, u raportua se agjentët kërkuan dokumente të klasifikuara që Trump dyshohet t’i ketë marrë nga shtëpia e bardhë në fund të mandatit të tij.
Republikanët i cilësojnë hetimet si të motivuara politikisht. Udhëheqësi i pakicës në Dhomën e Përfaqësuesve, Kevin McCarthy u zotua të hapë një hetim nëse republikanët marrin kontrollin e Dhomës së Përfaqësuesve në fillim të vitit të ardhshëm, diçka qe sipas sondazheve ka shumë gjasë të ndodhë.
“Kam parë mjaft. Departamenti i Drejtësisë ka arritur në një gjendje të patolerueshme politizimi. Pasi republikanët të marrin kontrollin e Dhomës së Përfaqësuesve, ne do të bëjmë një hetim të menjëhershme të këtij departamenti, do të ndjekim faktet dhe nuk do të lëmë gur pa lëvizur”, tha Kevin McCarthy.
Ish-zëvendës presidentin Mike Pence, i cili së fundmi e kishte distancuar veten prej tij mes spekulimeve se do të rikandidonte krah Trumpit për Shtëpinë e Bardhë në 2024-n, i kërkoi prokurorit të përgjithshëm të japë shpjegime të plota përse ishte kryer bastisja.
“Unë ndaj shqetësimin e thellë të miliona amerikanëve për kontrollin e paprecedentë të rezidencës personale të Presidentit Trump. Asnjë ish-president i Shteteve të Bashkuara nuk i është nënshtruar ndonjëherë një bastisjeje në rezidencën e tyre personale, në historinë e Amerikës”, tha Mike Pence.
Ligjvënësit e tjerë republikanë e quajtën kontrollin një shpërdorim të pushtetit, edhe pasi ai ishte i autorizuar nga gjykata dhe ka të ngjarë të jetë miratuar në nivelet më të larta të Departamentit të Drejtësisë. Ende nuk dihet se çfarë roli ka luajtur prokurori Merrick Garland në këtë çështje. Ligjvënësja konservatore Marjorie Taylor Greene kërkoi anulim të fondeve për FBI-në.
