Kryeministri i Kosovës, Albin Kurti, përmes një videomesazhi në rrjetet sociale iu ka bërë thirrje shqiptarëve që jetojnë në Serbi që të marrin pjesë në procesin e regjistrimit të popullsisë dhe të pronave.
Sipas Kurtit, procesi që nisi më 1 tetor dhe do të zgjasë një muaj, nuk është thjesht një statistikë, por do të bëjë që të dëgjohet zëri i shqiptarëve.
“Si kryeministër i Republikës së Kosovës ftoj shqiptarët që jetojnë në Serbi, e në veçanti në komunat Preshevë, Medvegjë e Bujanoc, që t’i përgjigjeni regjistruesve, duke regjistruar veten e familjarët. Ju ftoj që shtypjes t’i përgjigjeni me regjistrim. T’i përgjigjeni pasivizimit duke regjistruar çdo shqiptar. Edhe ata që gjenden me banim të përkohshëm në diasporë dhe Kosovë. Të dëshmoni me vendosmëri që jeni aty”, tha Kurti.
Sipas vlerësimeve të bashkësisë ndërkombëtare, në Serbi jetojnë rreth 60 mijë shqiptarë, kryesisht në tri komunat e Preshevës.
