Emri i thotë të gjitha. “I Am Jesus Christ” (Unë jam Jezu Krishti). Kështu quhet çmenduria e fundit në industrinë e videolojërave që ka shkaktuar polemika.
E njoftuar në vitin 2019, krijuesit e lojës më në fund kanë konfirmuar se kur do të mund ta luajmë për herë të parë. Nëpërmjet një traileri të ri dhe blasfemues, djemtë e SimulaM kanë njoftuar se më 1 dhjetor 2022 do të lançojnë një lloj “demo” në Steam që ata e përshkruajnë si “një version të shkurtër të lojës”, në të cilën mund të “eksploroni Nazaretin e lashtë dhe mënyrën e jetesës së asaj kohe”.
Në “I Am Jesus Christ” do të ketë çdo gjë: mrekulli, ringjallje, shumim peshku dhe shumë gjëra të tjera.
“Do të zhyteni në kohët e vjetra dhe do të ndiqni të njëjtën rrugë që ndoqi Jezu Krishti 2000 vjet më parë. Që nga koha kur u pagëzua deri në vdekjen e tij dhe ringjalljen e mëvonshme. A keni menduar ndonjëherë se si do të ishte të ishe si Ai, më i fuqishmi në planet?”, lexohet në përmbledhjen e distributorit të videolojës, “PlayWay”.
“I Am Jesus Christ” do të jetë një lojë “open world”, me “më shumë se 30 mrekulli” për të bërë, “aftësi të veçanta” dhe të gjitha situatat nga Dhiata e Re. Zhvilluar në Unreal Engine 5, loja ka më shumë se 60 personazhe nga Bibla dhe do të ketë kapituj të tillë si kryqëzimi i Jezusit apo ringjallja e tij.
