Ambasadori shqiptar në Britaninë e Madhe, kërkoi nga Londra të mërkurën që ti kërkojë ndjesë shqiptarëve për fushatën anti-emigrantë në mediat djathtiste britanike, që pasuan komentet armiqësore të sekretares së brendshme britanike.
‘Fëmijët me origjinë shqiptare, po bullizohen në shkollat britanike për shkak të mbulimit negativ të mediave’, tha Qiriako Qirko para një komiteti të parlamentit britanik.
Ambasadori shqiptar në Londër, ishte ftuar nga ligjvënësit britanikë që ti përgjigjej pyetjeve në lidhje me gomonet e mbushura me emigrantë që kapërcejnë pa u ndalur kanalin anglez.
Marrëdhëniet mes Londrës dhe Tiranës, kanë qenë të acaruara muajt e fundit ndërsa qeveria britanike po përpiqet të ndalë kalimet në kanal. Më shumë se 40 mijë emigrantë kanë ndërmarrë udhëtimet shpesh të rrezikshme në barka të vogla deri më tani, këtë vit, dhe shqiptarët janë tani grupi më i madh mes tyre.
Ambasadori Qirko pranoi se shumë prej shqiptarëve që tentojnë brigjet e Londrës, janë emigrantë ekonomikë, ndërkohë që ka edhe nga ata që pretendojnë se janë viktima të skllavërisë moderne dhe si të tillë pretendojnë azil. Por, ai kundërshtoi zëshëm një deputet konservator, që tha se Shqiptarët vinin në Britani për tu bërë pjesë e krimit të organizuar.
Një javë më parë, kryeministri britanik Rishi Sunak dhe homologu i tij shqiptar Edi Rama, ranë dakord në një bisedë telefonike për të bërë më shumë me qëllim që të ndalet fluksi i shqiptarëve.
Sunak pranoi kontributin pozitiv të komunitetit shqiptar në Britaninë e madhe – tha Downing Street, pasi sekretarja e brendshme Suella Braverman zemëroi Tiranën dhe kombet e bashkuara, kur i konsideroi kalimet e paligjshme të detit një ‘Pushtim’.
Ministrja e brendshme më herët ka fajësuar kriminelët shqiptarë si ideatorë dhe organizatorë të fluksit të gomoneve.
