Shqipëria ka shënuar fitore bindëse ndaj Moldavisë, me rezultat 0-4, në ndeshjen e zhvilluar sonte për kualifikime në Euro 2020.
Shqipëria kaloi në avantazh ndaj Moldavisë në minutën e 22-të me një gol të shënuar nga Cikalleshi.
Pas disa aksionesh të njëpasnjëshme, më në fund kuqezinjtë arritën të gjejnë rrjetën e Moldavisë. Mbrojtja moldave gaboi me pasime në zonë dhe Cikalleshi e shfrytëzoi.
Në minutën e 33-të Kejdi Bare shënoi golin e dytë për shqiptarët. Ky ishte goli i parë zyrtar për Baren me kombëtaren.
Ndërsa golin e tretë e dha Trashi, në minutën e 40-të, me një goditje jashtë zonës së sigurisë.
Goli i katërt erdhi në minutën e 90-të nga Manaj, i cili realizoi me sukses, me thembër, një pasim të marrë nga Roshi.
