Tirana është tronditur mbrëmjen e së dielës nga një ngjarje tejet e rëndë kriminale, ku një grua ka mbetur e vrarë me armë zjarri, ndërsa 5 të tjerë janë plagosur.
Në ndryshim nga ngjarje e mëparshme kriminale, këtë herë autorët janë treguar të pamëshirshëm duke qëlluar me breshëri në drejtim të lokalit, në të cilin kishte disa persona. E vrarë nga të shtënat ka mbetur punonjësja e lokalit, shtetasja Mimoza Paja, rreth 50 vjeçe, ndërsa të plagosur kanë mbetur edhe 5 persona të tjerë: shtetasit S. M., 50 vjeç, A. M.,42 vjeç, E. S., 47 vjeç, E. B., 45 vjeç, G. Sh., 55 vjeç, të cilët ndodhen nën kujdesin e mjekëve. Gjithashtu është lënduar në dorë nga ciflat e xhamave, një e mitur 10-vjeçare.
Policia konfirmoi se lokali ku ka ndodhur ngjarja e rëndë është në pronësi të shtetasit Fatjon Murati, me precedentë penalë. Ai është vënë në pranga në tetor të vitit të kaluar pasi ishte shpallur në kërkim se zotëronte një arsenal armësh, të kapur nga policia më 13 korrik.
Mes të plagosurve është edhe shtetasi Sahit Murati, i cili është xhaxhai i Fatjon Muratit me precedentë të mëparshëm penalë dhe sipas të dhënave të para mund të ketë qenë edhe ai objektiv i këtij sulmi të tmerrshëm me armë.
Tiranë/Informacion paraprak
Më datë 12.03.2023, rreth orës 21:05, në rrugën “Ananstas Shundi”, në lokalin në pronësi të shtetasit F. M., në rrethana ende të paqarta, nga persona ende të paidentifikuar, është qëlluar me armë zjarri.
Si pasojë ka humbur jetën shtetasja Mimoza Paja, rreth 60 vjeçe, banakierja e lokalit, si dhe janë plagosur shtetasit S. M., 50 vjeç, A. M.,42 vjeç, E. S., 47 vjeç, E. B., 45 vjeç, G. Sh., 55 vjeç, të cilët ndodhen nën kujdesin e mjekëve.
Gjithashtu është lënduar në dorë nga ciflat e xhamave, një e mitur 10-vjeçare.Për hetimin e kësaj ngjarjeje është ngritur një grup i posaçëm hetimor dhe nën drejtimin e Prokurorisë vijon puna intensive për zbardhjen e rrethanave të ngjarjes, sekuestrimin e provave që do të shërbejnë për zbardhjen e ngjarjes, identifikimin dhe kapjen e autorëve.
Ndërkohë janë ngritur pika kontrolli në bashkëpunim me Drejtoritë Vendore të Policisë Durrës, Elbasan, Lezhë e Dibër.
Shërbimet e Policisë po vijojnë kontrollet në gjithë territorin ku dyshohet që mund të kenë lëvizur ose ku mund të fshihen autorët.Njoftimi i policisë
