Ish-deputeti i Partisë Demokratike dhe një nga themeluesit e saj, Arben Imami, deklaron opozita është kapur që në maj të 2017 kur Lulzim Basha doli nga çadra dhe bëri marrëveshjen. Pra në zgjedhje opozita punoi për Partinë Socialiste dhe jo për veten e saj. Zgjidhja për të rikthyer fituese opozitën është largimi i Bashës.
Në një intervistë televizive, Imami tha se “PD nuk ka asnjë shans fitues me këtë formacion që ka sot.
Duke analizuar mosvotimin e hapjes së negociatave me BE-në, krahas fajësimit të qeverisë, e cila sipas Imamit, është përgjegjëse kryesore e dështimit, Imami lëshoi kritika edhe ndaj opozitës joparlamentare.
“Unë e kam thënë që djegia e mandateve mund ta çojë Partinë Demokratike në fitore, por edhe ne shuarjen e saj. Ishte një moment kyç që përcakton nëse lideri ka marrë vendimin e duhur apo jo. Por në këtë vend nuk njoh njerëz që kanë marrë përgjegjësi ndonjëherë” – tha Imami.
Ish-ministri foli dhe për një sondazh mbi popullaritetin e Lulzim Bashës te shqiptarët. “Me të gjitha veprimet që bën, futu në çadër dhe arri marrëveshje, dil nga parlamenti e kërko reformë zgjedhore, ka prodhuar një situatë të çuditshme. Ky njeri e ka pëlqyeshmërinë në popull 18% dhe kjo është alarmante. Nuk ka asnjë lider partie me 18% që ta nxjerrë fituese partinë në zgjedhje me të paktën 51%. Basha po e ngordh PD-në dhe po i bën një shërbim të plotë Edi Ramës”, – tha Imami.
Lidhur me negociatat Imami u shpreh se “Jo-ja nuk erdhi vetëm nga një vend si Franca, por nga tre vende që janë edhe themeluese të Bashkimi Europian. Para dy muajsh patëm informacione që presioni amerikan dhe ndryshimi i mendjes nga ana e Gjermanisë do ta bënte këtë proces të mundur. Tre vendet që na kanë refuzuar janë tre vende themeluese të BE-së”./
