Kryeministri Albin Kurti fajësoi atmosferën e frikësimi dhe shantazhit nga Beogradi për pjesëmarrjen e ulët në zgjedhjet lokale të 23 prillit. vetëm 3.47 për qind e popullsisë që jeton në 4 komunat veriore të Kosovës dolën për të votuar, pas thirrjeve të listës serbe dhe Beogradit për ta bojkotuar procesin.
“Zgjedhjet për kryetar në katër komunat veriore të Kosovës dhe për kuvendet komunale në dy prej tyre, u zhvilluan qetë dhe pa incidente. Falënderoj KQZ-në për organizimin, policinë e Kosovës për sigurinë dhe qytetarët për mbështetjen. Atmosfera ishte ajo e frikësimit dhe shantazhit andaj edhe dalja e qytetarëve në zgjedhje ishte e ulët. Bojkoti ishte i imponuar nga fushata kërcënuese e Beogradit zyrtar dhe e veglave të tij kriminale në terren në veri”.
Kryeministri Albin Kurti
Kurti premtoi mbështetjen e ekzekutivit për kryetarët e rinj të komunave veriore, të cilët mes sfidave kryesore me të cilat u duhet të përballen kanë përmendur qasjen në ndërtesat komunale. Kjo pasi shumica e tyre gjenden në objektet e njëjta me organet e përkohshme që punojnë sipas sistemit serb.
“Ata duhet të punojnë me përkushtim dhe të shërbejnë pa dallim. Qeveria do t’i përkrahë e ndihmojë. Sistemi institucional dhe shërbimet publike do të mund të funksionojnë më shumë e më mirë”.
Kryeministri Albin Kurti
Sakaq, Presidentja e Kosovës, Vjosa Osmani akuzoi Serbinë se po angazhohet vazhdimisht dhe haptazi për të penguar mbajtjen e zgjedhjeve në Kosovë. Qasja e Beogradit sipas Osmanit, bie ndesh me frymën e marrëveshjes për normalizimin e raporteve dhe si e tillë duhet të kundërshtohet nga e gjithë bota demokratike.
