Presidenti i Këshillit Evropian, Dolad Tusk, shpreson se kryeministrja britanike, Theresa May, do të shkojë të enjten në Bruksel me “sugjerime realiste”.
Tusk tha se BE-ja nuk do të rihapë marrëveshjen tashmë të dakorduar të daljes së Britanisë së Madhe nga Bashkimi Evropian.
Presidenti Tusk, në një konferencë të përbashkët për media me kryeministrin irlandez, Leo Varadkar, përsëriti qëndrimin e Bashkimit Evropian, që masa mbrojtëse në kufirin irlandez duhet të mbetet.
“Po pyesja se si duket një vend i caktuar në ferr, për ata që e promovuan BREXIT-in, pa pasur më parë ndonjë plan për mënyrën se si ta bënin atë në mënyrë të sigurt”, tha Tusk.
Ndërkaq kryeministri irlandez tha se marrëveshja e BREXIT-it, të cilën e hodhi poshtë parlamenti britanik ka qenë “më e mira e mundshme”.
