Shkodra dhe Lezha janë dy qarqet, në të cilat gjatë muajit qershor janë konstatuar nga efektivët e Policisë së Shtetit me numrin më të lartë të parcelave të kultivuara me bimë narkotike.
Ishte dikasteri blu ai që të dielën bëri bilancin e punës së saj gjatë 30 ditëve të muajit qershor, ku tha se në të gjithë vendin janë zhvilluar paralelisht 10 megaoperacione, si rezultat i të cilave janë asgjësuar në total 44.620 fidanë dhe bimë narkotike që ishin kultivuar apo po tentohej të kultivoheshin në mjedise të hapura dhe të mbyllura.
Në territorin e qarkut Shkodër, në kuadër të fazave të radhës të megaoperacioneve të koduara “Alpe të pastra”, “Baks” dhe “Mnela”, janë gjetur dhe asgjësuar 16.442 bimë dhe fidanë narkotike që ishin kultivuar në minisera dhe në terrene malore.
Në territorin e qarkut Lezhë, në kuadër të megaoperacionit të koduar “Imazhi”, janë gjetur dhe asgjësuar 19.084 bimë dhe fidanë narkotikë që janë gjetur gjatë kontrollit në fshatra të ndryshme të këtij qarku.
Ndërkaq, për goditjen e veprimtarive të prodhimit, shitjes dhe trafikimit të narkotikëve janë zhvilluar 25 operacione, si rezultat i të cilëve janë sekuestruar në total rreth 4.5 kg kokainë, 23.5 kg cannabis sativa, 1.4 kg heroinë dhe dhjetëra doza të drogave GHB, MDMA, Poppers dhe Ekstazi.
