Kryeministri Edi Rama njoftoi këtë të mërkurë vendimin e qeverisë për studentët e mjekësisë, ku nënvizoi se për t’u pajisur me diplomë këta të fundit duhet të punojnë 5 vite pas përfundimit të studimeve në spitalet shqiptare.
Gjatë deklaratës për media, Rama u pyet dhe në lidhje me refuzimin e kryeministrit Kurti për të patur një takim gjatë turit ballkanik që nis ditën e nesërme nga Prishtina.
Rama tha se sot ishte i fokusuar vetëm në vendimin e qeverisë për studentët e mjekësisë dhe në lidhje me vajtjen e tij në Prishtinë, do të flas nesër nga kryeqyteti i Kosovës.
“Jam këtu vetëm për këtë vendim. Për sa i përket vajtjes në Prishtinë do të flas kur është koha për të folur që është nesër për Prishtinë. Jam këtu vetëm për studentët e mjekësisë”, tha Rama.
Çfarë deklaroi Albin Kurti më herët?
Unë miqësisht i kam kërkuar kryeministrit Rama që ta mbajmë edhe mbledhjen e dy qeverive, e cila u anulua paarsyeshëm. Në mënyrë që këto marrëveshjet e dakorduara të mos mbeten në sirtar unë i kam propozuar kryeministrit Rama që meqë po vjen dy ditë në Prishtinë ta mbajmë edhe një mbledhje të përbashkët të dy qeverive. Procesi i Berlinit është shumë i rëndësishëm dhe nuk ka në Ballkan liderë si kryeministri i Kosovës që e ka mbështetur e vazhdon ta mbështesë procesin e Berlinit. Është për mua e nevojshme që ta kemi mbledhjen e dy qeverive. Për takime personale ne të dy kemi kontakt të drejtpërdrejtë. Unë jam i gatshëm të takohem me kryeministrin Rama në kuadër të mbledhjes së dy qeverive, jo në takime të tjera.
