Studentët e Universitetit të Mjekësisë në një dëgjesë në Komisionin për Punën, Çështjet Sociale dhe Shëndetësinë kanë paralajmëruar se do të bojkotojnë mësimin në vitin e ri akademik, nëse qeveria miraton Pr.ligjin për trajtimin e veçantë të studentëve që ndjekin programin e integruar të studimit të ciklit të dytë, mjekësi e përgjithshme në institucionet publike të Arsimit të Lartë.
Pesë studentët e Fakultetit të Mjekësisë kanë deklaruar para deputetëve se do të ndjekin të gjithë hapat e nevojshëm ligjorë, dhe do përdorin çdo mjet për ta kundërshtuar këtë ligj.
“Ky Pr.ligj shkel Kushtetutën, cenon lirinë e zgjedhjes, të drejtat e individit dhe lëvizjes së lirë.
Nuk na u paraqit në asnjë moment një draft të këtij pr.ligji.
Kërkesa nuk kishte një përgjigje, se pse s’ka asnjë draft.
Kemi organizuar dhe protesta. Në datë 5 korrik , përballemi me një vendim qeverie, ku tanimë s’ka 3 vite punë të detyruar, por për ata që hynë në mjekësi puna e detyruar është 5 vite.
Ne do procedojmë më pas dhe do tregojmë pse jemi kundër ligjit. Pse po bëhet kjo procedurë e përshpejtuar, pse kjo mungesë transparence?
Të kishit vullnetin për të na dëgjuar, që është minimalja, duhet të votonit kundër këtij pr.ligji.
Ne do ndjekim çdo hap dhe çdo mjet ligjor për ta kundërshtuar këtë ligj, duke nisur nga bojkoti te viti i ri akademik deri te dërgimi i ligjit në Gjykatën Kushtetuese”, kanë deklaruar studentët.
Ky pr.ligj përcakton se kandidatët për studentë të Universitetit të Mjekësisë, që të pajisen me diplomë, do u duhet të punojnë 5 vite në Shqipëri, dhe më pas mund të bëjnë tërheqjen e diplomës. Ndërsa për studentët nga viti i dytë në të gjashtin, do u kërkohet në fillim të këtij viti akademik që të nënshkruajnë një marrëveshje ku angazhohen se do të qëndrojë: përkatësisht studentët nga viti i dytë në të katërtin, tre vite punë në Shqipëri para diplomimit; dhe studentët e vitit të pestë dhe të gjatë të Mjekësisë, 2 vite punë me qëllim diplomimin.
Por nëse këta studentë që aktualisht janë në sistem nuk pranojnë marrëveshjen me Universitetin e Mjekësisë, Ministrisë së Arsimit dhe Ministrisë së Shëndetësisë, do u ofrohet mundësia që të paguajnë koston reale të studimit për vitet e mbetura.
