Pas 5 viteve nga mbyllja e çdo aktiviteti të lojërave të fatit, qeveria miraton projektligjin që rikthen vetëm bastet online. Ndryshe nga sa ndodhte deri në 2018, ku mund të luajë dhe vije baste fizikisht në mbi 4 mijë pika, ligji i ri përcakton të drejtën e të ushtruarit të këtij aktiviteti jo më shumë se 10 operatorë, të cilët do duhet të plotësojnë disa kushte.
Operatorët që do përfitojnë licencën për bastet online: E regjistruar në QKB për veprimatarinë e lojërave të fatit, të ketë një kapital jo më pak se 40 milionë lekë, të ketë 3 vite eksperiencë të paktën në 3 shtete të BE-së, të ketë gjeneruar në vitin e fundit të paktën 2 miliardë lekë xhiro.
Bastet online do të luhen përmes faqeve në internet, aplikacioneve apo platformave elektronike të dedikuara, të cilat do monitorohen nga Autoriteti i Mbikëqyrjes së Lojrave të fatit.
Operatorëve që do përfitojnë licencën, do t’u mbahet çdo vit 15% e të ardhurave të cilat parashikohet të shkojnë për financimin e projekteve ne fusha të ndryshme. Sipas qeverisë, nevoja e këtij projektligji erdhi pas evidentimit të adresave të paligjshme të basteve online. Në katër vite u gjetën 4035 adresa bastesh, ndërsa u proceduan penalisht 135 persona.
Pas miratimit nga qeveria, projektligji do të kalojë për shqyrtim në komisionet parlamentare në muajin Shtator.
