Ministria e Bujqësisë ka reaguar, në lidhje me disa publikime në media, për ndërprerjen e programit IPARD 2, bazuar në informacionin fillestar të dhënë nga Zyra Evropiane Kundër Mashtrimit [OLAF], pas një hetimi mbi akuzat për korrupsion në lidhje me zbatimin e programit IPARD II.
“Si masë parandaluese për mbrojtjen e interesave financiare të Bashkimit Evropian, Komisioni Evropian ka ndërprerë përkohësisht rimbursimet ndaj autoriteteve shqiptare për shpenzimet e kryera në kuadër të programit IPARD II. Komisioni Evropian nuk mund të komentojë mbi asnjë gjetje të mundshme të OLAF-it për zbatimin e programit IPARD II (2014-2020) në Shqipëri.”- thuhet në njoftimin për shtyp të të Komisionit Evropian.
Por ministria e Bujqësisë deklaron se programi i mbështetjes nuk është ndërprerë dhe se “puna dhe programi vazhdon”.
“Autoritetet shqiptare janë vënë në dijeni të një pezullimi të faturës aktuale të rimbursimit nga DG AGRI për një pjesë të shpenzimeve te radhës. Ky është një proces krejtësisht administrativ që lejon riverifikimin e sistemeve të kontrollit nga strukturat e akredituara të cilat do të marrin masat e nevojshme me qëllim vijimin normal të rimbursimit nga BE. Këto janë procedura normale të Bashkimit Evropian në kushtet kur ka nevojë të verifikohen shpenzime të dyshuara për aktivitet jo konform rregullave të përcaktuara.”- thuhet në njoftimin p-ër shtyp të ministrisë së Bujqësisë.
Sipas saj, të gjithë strukturat shqiptare janë në bashkëpunim dhe në koordinim të vazhdueshëm me zyrën e OLAF dhe DG AGRI, duke ofruar transparencë të plotë, sikurse kanë vepruar nga dita e parë e akreditimit, të të gjithë proceseve kontrolluese, hetuese dhe administrative të ndjekura deri më sot apo që mund të aktivizohen në të ardhmen.
Procesi i akreditimit të programit IPARD ka nisur prej më shumë se 10 vjetësh dhe zbatimi ka mundur të nis vetëm në fund të vitit 2018, pas akreditimit të strukturave operuese në përputhje me Marrëveshjen Kuadër, Sektoriale dhe Financiare të ratifikuara në Parlamentin shqiptar.
Sipas ministrisë së Bujqësisë, si çdo mekanizëm financiar, programi shqyrton, kontrollon dhe zbaton projekte në përputhje me rregulla të mirëpërcaktuara e të miratuara nga Bashkimi Evropian, të cilat kontrollohen dhe auditohen vazhdimisht nga struktura të brendshme e të jashtme.
“Nëse vërehen shkeljet, programi përcakton strukturat operuese që marrin masa dhe veprohet në përputhje me procedurat ligjore të parashikuara ashtu sikurse veprohet në çdo strukturë të ngjashme në vendet e Bashkimit Evropian. Kjo është një punë e përditshme ku të gjithë institucionet e akredituara punojnë bashkarisht, në respekt të rregullave të BE-së, për të përmirësuar hallka të ndryshme administrative të funksionimit në shërbim të suksesit të programit duke u përballur me sfidat e implementimit në sektorin bujqësor, ndaj është e rëndësishme që një program për zhvillimin ekonomik të Shqipërisë rurale të mos bëhet objekt i konsumit politik.”- thuhet në njoftim.
Ministria e Bujqësisë nënvizon programi se IPARD është një gur themeli për zhvillimin e bujqësisë shqiptare, rezultatet e të cilit i ka ndjerë zhvillimi i sektorit që reflektohet sot në indikatorë të rëndësishëm performancë pozitive.
Sipas saj, ky rezultat ka ardhur si pasojë e punës së jashtëzakonshme të përbashkët me fermerë e agropërpunues, si edhe të punonjësve të strukturave në Shqipëri dhe në Bruksel.
“Vetëm në këtë mënyrë kemi garantuar rezultate të prekshme duke mundësuar 85 pika grumbullimi, mbi 40 fabrika përpunimi agro- ushqimore, mbi 130 investime në mekanikë bujqësore dhe shtim sipërfaqesh të mbjella, mbi 50 investime në subjekte agroturistike, mbi 30 investime në stalla e ferma blegtorale, mbi 40 investime në kantina dhe vreshta, mbi 85 investime në sera, investime në energji të rinovueshme etj., me impaktin direkt të krijimit të mbi 5000 vende të reja pune.”- është bilanci që në mënyrë të përmbledhur bënë ministria e Bujqësisë.
Sipas saj, programi vazhdon dhe të gjithë strukturat e akredituara ne zbatim te tij janë në partneritet të plotë me partnerët evropianë për të mundësuar mbarëvajtje të suksesshme në të mirë të vendit.
