Ministri i Mbrojtjes Niko Peleshi në një takim me prefektët, kryetarët e bashkive si dhe drejtues të strukturave të mbrojtjes civile ka diskutuar në lidhje me masat për parandalimin e zjarreve gjatë sezonit të verës.
I pranishëm ishte dhe Drejtori i Përgjithshëm i Agjencisë së Mbrojtjes Civile, Haki Çako dhe Shefi i Shtabit të Përgjithshëm të FA gjeneralmajor Arben Kingji ku Peleshi kërkoi koordinim më të mirë të punës për përballimin e emergjencave në nivel vendor.
“Kemi 1600 punonjës zjarrfikës në të gjithë vendin, 182 mjete zjarrfikëse, 80 autobote uji, kemi personelin dhe mjetet e FA që siç e dini që në cdo emergjencë janë në ballë të aksionit, të gjitha strukturat e policisë që është në dispozicion dhe me të cilët punojnë shumë mirë, urgjencën shëndetësore, rrjetin e vullnetarëve. Kemi helikopterët “Cougar”, dronët ”Puma” që janë vënë në përdorim nga viti i kaluar e që na japin informacion shumë të saktë dhe në kohë shumë të shpejtë. Gjithashtu edhe imazhet satelitore janë tani një ndihmë dhe një vlerë e shtuar në emergjencat civile. Deri tani për periudhën qershor-korrik kemi pasur 125 vatra zjarri të cilat janë përballuar shumë mirë”, u shpreh ministri Peleshi.
Ministri Peleshi tha se janë evidentuar 125 vatra zjarrit në muajt qershor-korrik gjithashtu foli edhe për situatën aktuale në dy vatrat aktive, në pyllin e fshatit Peshtan në Fier dhe fushën e mbetjeve në Vlorë.
“Kemi hyrë në një stinë të nxehtë, më të nxehtë se ajo e vitit të kaluar. Kemi patur edhe shumë zona të freskëta malore ku ka patur zjarre vitin e kaluar. Pra vigjilenca duhet të jetë kudo duke filluar nga komunitetet. Sinjalizimi i hershëm është çelësi. Shmangin atë që është thelbi, humbjen e jetëve të njerëzve, sepse përmasat e emergjencës nuk mund të rriten nëse jemi në monitorim. Kemi parë që vende shumë më të fuqishme se ne si Turqia, apo edhe së fundi Greqia përballen me emergjenca shumë të forta, dëme të mëdha, në njerëz në pasuri. Pra, nuk është e lehtë, sado ta kesh flotën e helikopterëve apo zjarrfikësit, nuk mund të përballesh me emergjencat kur ato marrin përmasa të mëdha ”, tha Ministri i Mbrojtjes Niko Peleshi.
