Ish-drejtori i Policisë së Malit të Zi, Veselin Veljoviç, u arrestua mëngjesin e së hënës me urdhër të Prokurorisë Speciale të Shtetit fqinj.
Ndaj tij rëndojnë akuzat për “krijim të një organizate kriminale, abuzim me pozitën zyrtare dhe kontrabandë”.
Departamenti i Policisë Speciale, në bashkëpunim me EUROPOL-in, po kryen kontroll edhe në disa banesa në Podgoricë, Nikshiç, Zhabljak dhe Mojkovac, pasi me akuza të njëjta po përballen edhe tre persona tjerë.
Veljoviç ka qenë drejtori i Policisë së Malit të Zi në periudhën 2007-2011, dhe prej mesit të vitit 2018 deri në fund të vitit 2020.
Ai ka qenë edhe këshilltar i ish-presidentit të Malit të Zi, Filip Vujanoviç. Ai ka qenë poashtu edhe sekretar i Këshillit Kombëtar të Sigurisë së Malit të Zi dhe nga viti 1995 – 2005, ka qenë edhe komandant i Njësitit Special kundër-Terrorizmit.
