Nga qyteti i Vlorës, ku u zhvillua seminari i XVI i gjuhës shqipe në diasporë, Ministrja e Arsimit, Evis Kushi ka bërë me dije se brenda këtij viti do të mbahet edhe Samiti i Madh i Diasporës. E pranishme në seminar ishte edhe Ministrja e Arsimit e Kosovës, Arbërie Nagavci, ndërsa në fjalën e saj, Kushi tha se qëllimi është mësimi i gjuhës shqipe me profesionalizëm dhe se për këtë arsye ka nisur edhe licencimi i mësuesve të gjuhës shqipe.
Ministrja bëri me dije po ashtu se në shtator të këtij viti, Qendra e Botimeve për Diasporën për herë të parë do të organizojë shkollën e parë verore për nxënësit dhe mësuesit e diasporës.
Fillimisht bëhet fjalë për një projekt pilot vetëm me nxënësit dhe mësuesit e Greqisë, por Ministrja theksoi se më vonë do të përfshijë mësues dhe nxënës shqiptarë nga e gjithë bota.
“Ne nuk duam vetëm të mësohet gjuha shqipe, por gjuha shqipe të mësohet pastër, bukur me profesionalizëm, jo vetëm me dashuri dhe përkushtim, por edhe me profesionalizëm. Dhe prandaj ka filluar edhe licencimi i mësuesve të gjuhës shqipe. Kemi lajme shumë të mira në fakt. Në shtator Qendra e Botimeve për Diasporën për herë të parë do të organizojë shkollën e parë verore për nxënësit dhe mësuesit e diasporës. Po e fillojmë pilot vetëm me nxënësit dhe mësuesit e Greqisë por natyrisht do të ketë një traditë të përvitshme duke përfshirë mësues dhe fëmijë shqiptarë nga gjithë bota. Po kështu së shpejti brenda këtij viti do të organizohet edhe Samiti i madh i Diasporës. Sigurisht është Ministria për Evropën dhe Punët e Jashtme organizatori kryesor, por me të gjitha ministritë do të ketë tryeza, do të ketë ditë të veçanta pikërisht që të gjithë të jemi të përfshirë, dhe të gjithë të bëjmë më të mirën në fushat tona specifike”, u shpreh Kushi.
