Një gjykatë në Marok dënoi me 5 vite burg një burrë 48 vjeçar nën akuzën se kishte fyer monarkinë, një krim i konsideruar i rëndë në këtë vend.
Në fakt Said Boukioud, kishte kritikuar në rrjetet sociale vendimin e mbretit për të normalizuar marrëdhëniet mes Marokut dhe Izraelit, por kjo gjë u interpretua nga trupi gjykues si një fyerje ndaj kreut të shtetit.
Kjo edhe në bazë të Kushtetutës, ku çështjet që kanë lidhje me politikën e jashtme janë kompetencë e monarkut Mohammed VI.
Avokati mbrojtës i Boukioud deklaroi se vendimi i shkallës së parë do të apelohet, ndërkohë që e cilësoi atë si shumë të rëndë dhe të pakuptueshëm.
Maroku dhe Izraeli kanë normalizuar marrëdhëniet diplomatike mes tyre 2 vite më parë, në një akord të ndërmjetësuar nga Shtetet e Bashkuara.
