Ai konsiderohej si një nga ‘kokat’ që organizoi grabitjen e bujshme që ndodhi në Rinas 4 vjet më parë, teksa katër persona hynë në barkun e avionit që po nisej për në Vjenë dhe morën shumën prej afro 5 milionë euro. Ai u arrestua kohë pas grabitjes bashkë me të vëllanë dhe sapo ra në pranga, rrezikshmëria për të cilën flitej, e bëri drejtorinë e Burgjeve që ta izolonte në 41 Bis.
Kështu njëri nga të akuzuarit për grabitjen e 4.6 milionë eurove në pistën e aeroportit të Rinasit, Klement Çala vijon betejën me ministrinë e Drejtësisë për izolimin në sistemin 41 Bis, një regjim sigurie tepër i ashpër në sistemin e burgjeve në Shqipëri. Në fund të korrikut, në gjykatën e Lartë është regjistruar çështja penale me objekt, kundërshtimin e urdhrit të ministrit të Drejtësisë nr. 230, datë. 20 maj 2022, “Për vendosjen në regjimin e posaçëm të ushtrimit të të drejtave në burgun e sigurisë së lartë për të paraburgosurin Klement Çala”.
Avokatët e të dënuarit e bazojnë kërkesën e tyre në Konventën Evropiane për të Drejtat e Njeriut, në Kushtetutën e Shqipërisë dhe Kodin e Procedurave Administrative si dhe ligjin për të drejtat dhe trajtimin e të dënuarve me burgim dhe të paraburgosurve”.Kërkues rezulton vetë i dënuari, ndërsa relator i çështjes është anëtari i gjykatës së Lartë, Ilir Panda. Beteja ligjore e të dënuarit për grabitje me ministrin e Drejtësisë, ka nisur që prej vitit 2022, menjëherë pas urdhrit për izolimin në sistemin 41 BIS, i cili në tetor të atij viti u anulua nga Gjykata e Posaçme. Ky regjim i krijuar vitet e fundit në sistemin e burgjeve në Shqipëri, parashikon izolimin e personave të dënuar për krime të rënda dhe krim të organizuar me qëllim shkëputjen e tyre nga çdo mundësi bashkëpunimi apo mbajtje lidhje me personat jashtë.
Klement Çala është dënuar me 20 vjet heqje lirie për akuzën e pjesëmarrjes në grabitjen e 4.6 milionë eurove në pistën e aeroportit të Rinasit në prill 2019 në bashkëpunim me një grup të strukturuar kriminal ku bënte pjesë edhe Admir Murataj, personi që u vra po atë ditë që u krye grabitja. Në fakt, asaj grabitjeje i faturohen shumë krime të mëpasshme në vendin tonë, që lidhet me vrasje dhe atentate të shumta që kanë përgjakur vendin kryesisht në Elbasan, Tiranë dhe Durrës.
