Qeveria shpërndau sot me shpejtësi e pompozitet të fortë një operacion të gjerë policor për arrestimin e shpërndarësve të drogës në disa qytete të vendit. I entuziazmuar ishte edhe kryeministri Edi Rama, i cili e përshëndeti operacionin dhe e prezantoi atë si rritje e forcës goditëse të Policisë së Shtetit. Arrestimi i 233 shpërndarësve të drogës thotë Rama, “është një tjetër provë e ngritjes së luftës kundër krimit të organizuar në një nivel të ri”.
Natyrisht kushdo që shpërndan drogë e shkelë ligjin duhet të përgjigjet, s’ka asnjë dyshim këtu. Por siç ndodh zakonisht me Rilindjen, kur gjërat i bën më shumë për propagandë sesa për të zbatuar ligjin, do të shpëtojnë edhe elementë banalë apo qesharakë.
I tillë ishte edhe episodi kur në pamjet që ka nxjerr Policia e Shtetit shfaqet edhe arrestimi i një personazhi atipik të sjellë në vëmendjen publike kryesisht përmes rrjeteve sociale dhe më pas në studion e Arjan Çanit. Është fjala për atë që njihet me nofkën Ujku i Cërrikut.
Për ta qesharakëzuar akoma më tej operacionin, regjia e propagandës së Taulant Ballës, kishte vendosur që Ujkun e Cërrikut ta shoqëronte me kurorë të improvizuar mbretërore në komisariat, t’i lejonte atij një ulërimë përpara kamerës dhe as të mos i mbulonte fytyrën siç bëri me të arrestuarit e tjerë. Një përpjekje mjerane për lavdi e sukses nga Ministri i Brendshëm, a thua se arrestuan mbretin e kokainës në Shqipëri apo bosë të krimit të organizuar.
Sigurisht vënia në pranga e shpërndarësve të drogës është lajm i mirë, por mbetet një punë gjysmake kur nuk shkohet asnjëherë të bosët e krimit, te ata që kontrollojnë realisht trafikun dhe shpërndarjen e drogës. Çfarë paraqet Edi Rama dhe Taulant Balla janë seria e radhës e një filmi të parë me Rilindjen dhe qasjen e saj me krimin e organizuar.
Taulant Balla është cullak përballë dështimit për të arrestuar miqtë e tij të Rrajave në Fushë Krujë për dhunën barbare ndaj fisit Maja. Që ditën e parë si Ministër i Brendshëm ai dekurajoi Policinë e Shtetit që të mos i afroheshin Rrajave sepse ishin miqtë e tij.
Më pas Prokuroria e Tiranës e “okupuar” nga familja e deputetes së PS-së, Ermonela Felaj, zbuti akuzat për Rrajat. Përballë këtyre fakteve Edi Rama dhe Taulant Balla nuk mund të fshihen dot, sado spaçatorë hashashi të arrestojnë dhe të brohorasin për sukses të Policisë së Shtetit.
