Lirimi nga paraburgimi i shumë ish funksionarëve shtetëror të akuzuar për vepra të rënda penale hap çështjen se cili është kuptimi i ekzistimit të kësaj mase.
Kështu thotë profesori Bashkim Selmani, pasi që mbrëmë Gjykata e Apelit i zëvendësoi Katica Janevës paraburgimin me masën tjetër të arrestit shtëpiak.
Nga Koalicioni “Të gjithë për gjykim të drejtë” komentojnë se gjykatësit e apelit në asnjë rast nuk duhet të thirren në përgjegjësi penale, pasi që prokurorja Vilma Ruskoska paralajmëroi hetim financiar kundër tyre, sepse edhe ajo si prokurori është palë në rastin “Reket”.
“Tek ne në të kaluarën, ka ndodhur që Gjykata e Apelit të tjetërsojë ndonjë vendim të gjykatave themelore. A do të thotë kjo që çdo prokuror që nuk është i kënaqur nga vendimi i gjykatës më të lartë, duhet të ngrejë hetime kundër Këshillave dhe gjykatësve të Apelit? Puna e tyre është pikërisht kjo, të shqyrtojnë atë që është marrë si vendim në shkallë të parë dhe nëse vlerësojnë që është shkelur procedura apo ka më shumë argumente në njërën apo anën tjetër si shkallë më e lartë, të vendosin në ndonjë drejtim”, tha Natali Petrovska- Koalicioni për gjykim të drejtë.
Petrovska shton që gjykatësit e Apelit kanë marrë vendim që sipas ligjit është në kompetencën e tyre, dhe për këtë s’mund të thirren në përgjegjësi./Alsat/
