Edhe një tjetër reagim për injorim të Kosovës ka nisur të bëjë bujë. Në Shqipëri, në një libër ku është shfaqur harta e rajonit të Ballkanit, Kosova nuk është.
Në një postim në rrjetin social Facebook, Ministrja e Arsimit në Shqipëri, Besa Shahini ka shfaqur keqardhjen e saj se në librin “Qytetaria 8” me pasaktësi në hartën e rajonit të Ballkanit, mungon Kosova.
Por thotë se ky gabim ka ardhur për shkak se një zinxhir punonjësish nuk e kanë vënë re.
“Kosova është Republikë dhe njihet si e tillë nga Shqipëria, Maqedonia e Veriut, Mali i Zi, 22 vende anëtare të BE-së, SHBA-të dhe shumë shtete të tjera aleate. Por nga autori i librit, te artisti grafik, te redaktori i shtëpisë botuese e deri te komisioni që ka dhënë OK për botim, nuk kanë qenë në gjendje ta vërejnë mungesën e shtetit të Kosovës në të!”, shkruan ajo.
Thekson ndër tjera se ky gabim është i paqëllimshëm, ndërsa thotë se janë bërë përmirësime kolosale në korrigjimin e teksteve shkollore.
“Por padiskutim që nuk do të duhej të ekzistonin pasaktësi të tilla në librat shkollorë!”, shton ministrja Shahini.
“Lajmi i mirë është se kjo ka ndodhur ndërkohë që po zhvillohet procesi i kontrollit të librave shkollorë, pasi sivjet është mbyllur procesi i hartimit të librave të reja. Pastaj do të vihet në lëvizje detyrimi për shtëpitë botuese që t’i adresojnë menjëherë me fletë plotësuese gabimet e konstatuara, ndërsa në vijim me redaktim të plotë”, përfundon ajo.
Por, të kujtojmë se pak ditë më parë kryeministri Edi Rama, derisa u uroi ditë të mbarë shqiptarëve me një video, nxiti reagime pasi në hartën e shpërndarë, territori i Kosovës shihej brenda kufijve të Serbisë.
Pas reagimeve, Rama ka ndërhyrë në postimin e tij duke i fshirë vijat e kufijve. Në profilin e tij gjendet vetëm një video, me foto ndryshe nga ato të mëparshmet, dhe gjithashtu ndryshon foto e postimeve.
