I dërguari i Bashkimit Evropian për çështjen Kosovë-Serbi foli pas takimit me presidentin serb Aleksandër Vuçiç dhe theksoi se dialogu mes dy vendeve do të jetë pjesë e agjendës së takimit të ministrave të Jashtëm të shteteve anëtare të BE-së që pritet të mbahet të hënën.
“Kjo vizitë do të ndikojë drejtpërdrejt në ato bisedime. Siç e kemi thënë shumë herë, nuk ka të ardhme europiane as për Serbinë, as për Kosovën, pa normalizimin e marrëdhënieve të tyre dhe zbatimin e marrëveshjeve të miratuara për normalizim, si ato aktuale ashtu edhe ato më herët që të shohim një rajon stabil, të begatë dhe europian të Ballkanit Perëndimor, prandaj dialogu është i një rëndësie vendimtare. Biseda jonë me presidentin Vuçiç dhe kryeministrin Albin Kurti do të vazhdojë në ditët në vijim”, tha Lajçak nga Beograd.
Më herët, nga Prishtina, Lajçak tha se pjesë e diskutimeve gjatë kësaj vizite të pesëshes së diplomatëve ishte përparimi në zbatimin e marrëveshjes për normalizim dhe deeskalimi i situatës, derisa ka potencuar se për sulmin terrorist të 24 shtatorit Serbia duhet të bashkëpunojë për t’i vënë para drejtësisë përgjegjësit.
“Dëshirojmë ta bëjmë të qartë se dënojmë fuqishëm sulmin ndaj policisë së Kosovës më 24 shtator. Të gjithë autorët e sulmit duhet të sillen para drejtësisë dhe presim bashkëpunim të plotë të Serbisë në këtë drejtim”, tha Lajçak pas takimit.
Ai shtoi se liderët kanë përgjegjësi ndaj qytetarëve të tyre dhe se si palët duhet të punojnë për deeskalimin dhe normalizimin e marrëdhënieve.
“Ne ia kemi përcjellë atë mesazh presidentit Vuçiç. Serbia dhe Kosova kanë hyrë në marrëveshje të reja në shkurt dhe mars të këtij viti dhe presim që të dyja palët të fillojnë të përmbushin obligimet e tyre si nga marrëveshjet e reja ashtu edhe nga ato të vjetra”, tha Lajçak.
Emisari europian në Prishtinë tha se Kosova duhet të nisë me themelimin e Asociacionit të komunave me shumicë serbe.
