Dy pengje të tjerë janë liruar nga paraburgimi i Hamasit pas ndërmjetësimit të Katarit dhe Egjiptit, sipas dy zyrtarëve izraelitë.
Hamasi tha gjithashtu se liroi dy pengje, sipas një deklarate nga zëdhënësi i Hamasit, Abu Obaida.
“[Ne] i liruam dy të arrestuarit duke pasur parasysh se armiku ka refuzuar që nga e premtja e kaluar t’i marrë ata” tha Abu Obaida.
“Ne kemi vendosur t’i lirojmë ata për arsye detyruese humanitare dhe shëndetësore”, ka deklaruar Abu Obaida.
Një burim i informuar për këtë çështje tha se pengjet ishin shtetas izraelitë. Një nga burimet tha se ata u liruan në Kryqin e Kuq, transmeton CNN.
Një nga zyrtarët izraelitë tha se ata nuk ishin ende në Izrael. Zyrtari tjetër izraelit tha se të dy pengjet ishin gra.
Komiteti Ndërkombëtar i Kryqit të Kuq (KNKK) konfirmoi se ata lehtësuan lirimin e dy pengjeve të tjera.
“Ne lehtësuam lirimin e 2 pengjeve të tjerë, duke i transportuar ata nga Gaza këtë mbrëmje. Roli ynë si një ndërmjetës neutral e bën të mundur këtë punë dhe ne jemi të gatshëm të lehtësojmë çdo lirim të ardhshëm. Shpresojmë që ata së shpejti të kthehen me të dashurit e tyre”, postoi ICRC në llogarinë e saj zyrtare X.
CNN kontaktoi ushtrinë izraelite, e cila nuk pranoi të komentonte deklaratën e Hamasit. Zyra e Kryeministrit izraelit tha gjithashtu se ata nuk kanë asnjë koment.
Të dielën, Izraeli tha se nuk do t’i përgjigjet pretendimit të Hamasit se ata ishin “të përgatitur” për të liruar dy pengje të tjerë, duke e karakterizuar atë si “propagandë gënjeshtare”. Të premten, Hamasi liroi dy pengje amerikane, Judith Tai Raanan dhe Natalie Raanan.
Ibrahim Dahman i CNN dhe Tamar Michaelis kontribuan duke raportuar në këtë postim.
