Dokumente e prova zyrtare, që agjentët e Byrosë Kombëtare të Hetimit ia kanë paraqitur prokurorëve të SPAK gjatë fazës së hetimit, por nuk janë lejuar të veprojnë përpara tjetërsimit e fshehjes së kapitaleve, madje këto prova nuk janë pasqyruar në akt-akuzë…
Në njoftimin e SPAK për arrestimin e Jamarbër Malltezit, për masën “Detyrim Paraqitje” ndaj vjehrrit Sali Berisha e ortakut Fatmir Bektashi, bën përshtypje ky fakt absurd:
– Në kompaninë “Homeplan Sh.p.k” të kullave, janë sekuestruar vetëm 45% e aksioneve të Malltezit, ndërsa 55% të ortakut Fatmir Bektashi nuk janë prekur, megjithëse krimin me truallin, ndërtimet dhe transaksionet e pista, këta i kanë bërë bashkë e së bashku janë nën hetim.
Informacione konfidenciale për “Pamfleti”-n, siguruar nga BKH që ka kryer hetimet e aferës së kompleksit “Partizani”, thonë se mbrapa mos-sekuestrimit të aksioneve të Fatmir Bektashit, qëndron paprekshmëria e pasurive të shumta reale, që ky bashkë me Jamarbër Malltezin, kanë fshehur jashtë Shqipërisë dhe me marifetin e gjoja likuidimit të kompanisë së kullave.
Po publikojmë dokumentet zyrtare, që provojnë skemën e ortakëve Jamarbër Malltezi e Fatmir Bektashi, për të fshehur pasuritë dhe kapitalet e tyre reale, nëpërmjet veprimeve administrative në regjistrin tregtar, mbi statusin e kompanisë së kullave “Homeplan Sh.p.k”.
Veprimi i parë/ Më 25 tetor 2022, vetëm 3 ditë pasi Fatmir Bektashi u njoftua të paraqitej në SPAK për ish-kompleksin “Partizani”; bashkë me ortakun Jamarbër Malltezi, vendosën që kompanisë t’i ndryshohej forma pronësore, nga “Shoqëri shqiptare”, në “Shoqëri e përbashkët shqiptaro-gjermane”, me 70% një firmë gjermane, por çuditërisht e pa deklaruar në QKB.
Pas ndryshimit të formës së pronësisë me tjetërsim aksionesh në Gjermani, kompania e kullave “Homeplan Sh.p.k”, që ishte me 22 miliardë lekë xhiro dhe 6.9 miliardë lekë fitim neto për vitin 2021; befasisht mbeti me 400 milionë lekë kapital total në tetor 2022 e deri në tetor 2023, të cilët përfaqësohen nga Fatmir Bektashi edhe në emër të Jamarbër Malltezit.
Veprim i dytë/ Më 3 tetor 2023, katër ditë para se SPAK të sekuestronte kompjuterët e kompanisë “Homeplan”; dhe 2 javë dy javë para arrestimit të Jamarbër Malltezit e Fatmir Bektashit, këta kanë kaluar kompaninë në likujdim 100%, me likuidues Fatmir Bektashin.
Sipas tyre, shkak i kalimit të kompanisë së kullave në likuidim total, është gjoja dalja me humbje dhe përfundimi i funksionimit si biznes ndërtimi, kur “Homeplan Sh.p.k” e Bektashit dhe Malltezit, vazhdon ndërton 34 pallate te kompleksi “Magalem 21” në Tiranë, të cilat i ka reklamuar dhe kryeministri Edi Rama në “ERTV” e “FB”.
Nëse kjo kompani është me humbje dhe nuk e kryen funksionin, nuk ka pse QKB të pranojë të deklarohet e regjistrohet si kompani në likuidim me likuidues pronarët Malltezi e Bektashi, por të çohet në gjykatë si biznes i falimentuar, ku caktohet administrator likuidues për kapitalet e saj.
Në informacion, thuhet se gjatë procesit të hetimit, gjurmët e fshehjes së kapitaleve, të ardhurave e fitimeve të kompanisë “Homeplan” të kullave, kanë çuar te kompanitë “Kontakt” “Swarco” e “Berndard Engineers”, të cilat janë në pronësi të Fatmir Bektashit, gjermano-austriakut Gunther Kofler, Pandi Carapulit dhe Jamarbër Malltezit në hije.
Këto prova zyrtare, hetuesit e BKH ia kanë paraqitur prokurorëve të SPAK gjatë fazës së hetimit, por nuk janë lejuar të veprojnë përpara akteve të tjetërsimit dhe fshehjes së kapitaleve, madje këto prova nuk janë pasqyruar as në akt-akuzë./Pamfleti
