Reforma e Gjendjes Civile ka shtuar gamën e shërbimeve “on-line” për qytetarët, të cilëve krahas dokumenteve me nënshkrim elektronik që prodhohen me të dhënat e Regjistrit Kombëtar të Gjendjes Civile (RKGjC) të vitit 2010, u mundësohet dhe përftimi i dokumenteve të tjerë që më parë lëshoheshin nga zyrat e gjendjes civile në bashki/ njësi administrative dhe zyrat e arkivës së gjendjes civile pranë prefektit të qarkut në sportel.
Në këtë mënyrë për shtetasit shqiptarë ofrohet një shërbim pa kosto, duke shmangur prezencën e nevojshme, kontaktin me nëpunësit e gjendjes civile në sportel, si dhe kohën fizike që më parë kërkohej për tërheqjen e dokumenteve në zyrat e gjendjes civile sipas organizimit të tyre, sipas amendimeve përkatëse.
Problematikat e ndeshura dhe propozimet për zgjidhje
Ministria e Brendëshme ka bërë disa propozime ligjore, që adresojnë zgjidhjen e problematikave të ndeshura gjatë zbatimit, referuar çështjes kryesore që ka të bëjë me globalizimin, ku një pjesë e konsideruarshme e shtetasve shqiptarë zhvillojnë aktivitetin e tyre jetësor jashtë vendit.
Problematikat u adresohen shtetasve shqiptarë, që kanë të bëjnë me persona me qëndrim të rregullt të pajisur me leje qëndrimi, apo që gëzojnë shtetësinë e huaj, të cilët në këto vende kryejnë dhe veprime të tjera, në mbrojtje të të drejtave të tyre personale, siç është p.sh., ndryshimi i përbërësve të gjendjes civile, emër, mbiemër, etj.
Ndryshimet që propozohen
Ndryshimet në ligjin “Për gjendjen civile”, kanë të bëjnë me përqasjen e problematikave të krijuara me qëllimin ruajtjen e njëtrajtshmërisë së identitetit të personit, lëvizjen e lirë të shtetasve.
Projektligji i propozuar, që bëhet publik nga rtsh.al, synon të përmirësojë disa aspekte të zbatimit të ligjit “Për gjendjen civile”, që lidhen kryesisht me: – njëtrajtshmërinë e identitetit të tyre me qëllim shmangien e çdo pengese administrative që mundëson lëvizjen e lirë, duke pasqyruar dhe evidentuar në mënyrë të saktë përbërësit e gjendjes civile për të cilat shërbimi i gjendjes civile është përgjegjës.
Vlen të theksohet se në shërbimin e gjendjes civile duhet të pasqyrohen vetëm ato përbërës që janë marrë në përputhje me ligjin e shtetit të huaj dhe jo ato që mund të jenë ndryshuar në mashtrim të tij, i referohemi këtu regjistrimeve që disa shtetas shqiptarë kanë patur në shtetin e huaj, duke deklaruar të pavërteta për sa i përket regjistrimit të tyre fillestar në Shqipëri, të cilat nuk mund të gjejnë pasqyrim; – një prej veprimtarive kryesore që propozohet të përmirësohet ka të bëjë me rregullimin e procedurave për vendbanimin, regjistrimin e vendqendrimit të shtetasve të huaj, si dhe qartësimin e veprimeve që lidhen me dokumentimin e faktit juridik të lindjes së fëmijës, i referohemi këtu fëmijëve që lindin të vdekur, si dhe në modalitete të mëtejshme që duhet të ndjekin nëpunësit e gjendjes civile në bashki / njësi administrative gjatë lidhjes së martesës, etj.
