Kjo e diel shënon 4-vjetorin e termetit që tronditi vendin mëngjesin e 26 nëntorit të vitit 2019, ku si pasojë humbën jetën 51 qytetarë dhe mbi 1 mijë të tjerë u plagosën.
Tërmeti shkaktoi dëme të mëdha materiale dhe shembjen e qindra banesave, duke lënë pa strehë shumë familje kryesisht në Thumanë, në Lezhë dhe në disa zona të Durrësit.
Katër vite pas tërmetit, procesi i rindërtimit në bashkinë Lezhë, një ndër zonat më të prekura, po shkon drejt fundit. Mbi 85% e objekteve kanë përfunduar dhe janë rreth 200 familje që janë strehuar në apartamentet e reja.
“U bënë plot 191 familje të strehuara në pallatet që u rindërtuan në lagjen Gurra, Bistri dhe Skënderbe. Sa i përket shtëpive individuale, jemi në fazën që bashkia e Lezhës nga fondet e rindërtimit, ka lidhur kontrata dhe ka rialokuar 60 për qind të fondit për 207 familje të cilat do i ndërtojnë vetë shtëpitë e tyre,” thotë Ermal Pacaj, nënkryetar i bashkisë së Lezhës.
Puna ka stopuar vetëm për 41 banesa individuale për shkak të rritjes së kostos së ndërtimit. Gjithsesi po punohet për t’i dhënë zgjidhje kësaj problematike.
“Në fakt bashkia e Lezhës e bëri procedurën për firma që e mori përsipër kontratën dhe u tërhoq kundrejt penaliteteve që parashikonte kontrata. Po bëhemi gati për hedhjen e procedurës për herë të dytë. Kjo do kërkojë disa rregullime të vogla ligjore. Mendoj se do i japim zgjidhje shumë shpejt,” shton z. Pacaj.
