Ministri i Jashtëm i Rusisë ka lëshuar një paralajmërim ogurzi për Perëndimin, duke pretenduar se “dominimi 500-vjeçar i botës” po i vjen fundi, shkruan britanikja ‘The Sun’.
Në një fjalim të transmetuar sot në Katar, miku i Putin, Sergei Lavrov e krahasoi luftën në Ukrainë me betejat e kaluara të Rusisë me ushtritë e Hitlerit dhe Napoleonit dhe tha se vendi i tij tani është më i fortë se kurrë.
73-vjeçari, i cili është i sanksionuar nga Britania e Madhe dhe BE, e përshkroi “luftën hibride” si një luftë që po e bën Perëndimi kundër Rusisë si të bazuar në “kulturën e anulimit”.
Dhe ai deklaroi se Perëndimi së shpejti do të shihte se Rusia është bërë më e fuqishme si rezultat i konfliktit të vazhdueshëm në Ukrainë.
Lavrov tha:
“Në fillim të shekullit të 19-të, Napoleoni mblodhi pothuajse të gjithë Evropën për të sulmuar Rusinë dhe ne e mundëm atë dhe u bëmë më të fortë pas atij agresioni. Në mesin e shekullit të kaluar, Hitleri bëri të njëjtën gjë. Ai vuri nën komandën e tij shumicën e vendeve evropiane për të nisur kundër Rusisë. Ai gjithashtu u mund dhe ne u bëmë më të fortë pas asaj lufte.
Dhe rezultati i luftës së nisur nga Shtetet e Bashkuara duke përdorur Ukrainën kundër Rusisë tashmë është parë … rezultati kryesor për ne dhe për të tjerët meqë ra fjala, të cilët do ta ndiejnë këtë rezultat më vonë, është se Rusia tashmë është bërë shumë më e fortë se ishte para këtyre ngjarjeve. Dhe ky do të jetë rasti pasi të ketë mbaruar lufta.”
I pyetur për mundësinë e një armëpushimi ose paqeje midis vendeve ndërluftuese, Lavrov tha se “u takon ukrainasve të kuptojnë se sa thellë janë në vrimën ku i kanë futur amerikanët”.
Ai shtoi: “Duhet të telefononi Zelensky sepse një vit e gjysmë më parë ai nënshkroi një dekret që ndalonte çdo negociatë me Putinin”.
Intervista me Al Jazeera vjen pasi Shtetet e Bashkuara të premten vendosën veton ndaj një kërkese të propozuar të Këshillit të Sigurimit të OKB-së për një armëpushim të menjëhershëm humanitar në luftën midis Izraelit dhe grupit militant palestinez Hamas.
Lavrov foli sot për konfliktin, duke thënë: “Ne e dënuam fuqishëm sulmin terrorist kundër Izraelit më 7 tetor. Në të njëjtën kohë, ne nuk besojmë se është e pranueshme të përdoret kjo ngjarje për ndëshkimin kolektiv të miliona njerëzve palestinezë me granatime pa dallim”.
Ai tha se për të pasur “pauza humanitare” në Gaza duhej “një lloj monitorimi në terren”.
Ndërkohë, ish-presidenti rus dhe mik i ngushtë i Putinit , Dmitry Medvedev, ka parashikuar se “lumenj të rinj gjaku do të rrjedhin” dhe pohoi se globi nuk kishte qenë më afër një Lufte të Tretë Botërore bërthamore që nga kriza e raketave Kubane në 1962.
Ai kritikoi përpjekjet e administratës Biden për të detyruar kongresin amerikan të miratojë më shumë mbështetje ushtarake për Ukrainën dhe tha: “Ata kurrë nuk kanë zhvatur kaq shumë para për një shtet të vogël që është në proces kolapsi. Ata kurrë nuk kanë nxjerrë para në mënyrë kaq agresive dhe paturpësie për një vend që korruptoi hapur Presidentin aktual të Shteteve të Bashkuara dhe anëtarët e familjes së tij.”
Kuptohet se deklarata e fundit ishte në lidhje me akuzat për marrëveshje biznesi të dyshimta të lidhura me djalin e Joe Biden, Hunter, në Kiev.
