Miliarderi rus Roman Abramovich ka humbur sfidën e tij ligjore kundër sanksioneve të vendosura ndaj tij nga Bashkimi Evropian (BE) për shkak të luftës së Rusisë kundër Ukrainës.
Blloku 27-anëtarësh sanksionoi zyrtarët dhe biznesmenët rusë, duke ngrirë miliarda dollarë asete ruse, pas luftës së Moskës kundër Ukrainës në shkurt 2022. Abramovich, ish-pronar i klubit anglez të futbollit Chelsea, u ishte drejtuar instancave gjyqësore kundër këtyre kufizimeve.
“Gjykata e Përgjithshme rrëzon padinë e ngritur nga z.Abramovich, duke mbajtur në fuqi masat kufizuese të marra kundër tij”, tha Gjykata e Drejtësisë e BE-së në një deklaratë.
Ajo vuri në dukje se BE-ja “në fakt nuk gaboi në vlerësimin e saj” duke vendosur të përfshijë emrin e Abramovichit në listat e sanksioneve.
“Gjykata vëren, për më tepër, se përfshirja dhe mbajtja e emrit të z.Abramovich në listat në fjalë nuk përbën shkelje të pajustifikuar dhe disproporcionale të të drejtave të tij themelore, të cilat përfshijnë, në veçanti, të drejtën për respektimin e jetës private dhe familjare, lirinë për të kryer biznes dhe lëvizjen e lirë”, shtohet në deklaratë.
Në mars 2022, BE-ja tha se Abramovich kishte “lidhje të gjata dhe të ngushta me (Presidentin rus) Vladimir Putin”, duke e ndihmuar atë “të ruante pasurinë e tij të konsiderueshme”.
