Kryeministri i Kosovës Albin Kurti, me anë të një video të shpërndarë sot në mëngjes deklaroi se ushtria serbe po patrullon pranë kufirit me Kosovën, duke thënë se ky është provokim i rëndë ndaj Republikës së Kosovës.
Në lidhje me këtë deklaratë të Kurtit, ka reaguar kryetari i Komisionit për zbatimin e Marrëveshjes Ushtarako-Teknike (Marrëveshja e Kumanovës), Zoran Jovanoviç. Jovanoviç shprehet se ato që thotë Kurti janë vetëm dizinformime ndaj Forcave të Armatosura të Serbisë.
“Shprehjae mashtrimit dhe dezinformatave, të cilat janë ekspozuar shumë herë deri më tani si gënjeshtra më ordinere, janë pjesë e një fushate më të gjerë të Institucioneve të Përkohshme të Vetëqeverisjes në Prishtinë, e cila ka për qëllim ngritjen e tensioneve, mashtrimin e opinionit, krijimin e kushteve të padurueshme për jetën e serbëve në Kosovë dhe shmangia e obligimit të pranuar ndërkombëtarisht”, thuhet në deklaratën e Ministrisë së Mbrojtjes, Zoran Jovanoviç.
Ai sqaroi se postimi në rrjetet sociale tregon se “pjesëtarët e Forcave të Armatosura Serbe në Zonën e Sigurisë Tokësore kryejnë detyra të rregullta për sigurimin e linjës administrative dhe kontrollin e zonës së sigurisë tokësore, në përputhje me marrëveshjet ushtarako-teknike dhe të gjitha marrëveshjet e tjera të nënshkruara, sikurse në realizimin e atyre detyrave dhe zbatimin e Marrëveshjes Ushtarako-Teknike, Ushtria bashkëpunon me KFOR-in”.
