Fati tragjik e ka ndjekur një tifoz të gjigandëve anglezë Liverpool pak orë para se ekipi i tij i zemrës të zbresë në fushën e “San Siros” për të luajtur përballë Milanit.
Mediat italiane raportojnë se tifozi 51-vjeçar nga Irlanda ka vdekur pasi u aksidentua nga një makinë në përpjeke për të kaluar autostradën në Bergamo.
Tifozi irlandez i “The Reds” kishte mbërritur në Bergamo me një fluturim nga Mançesteri pak para mesnate së bashku me dy miqtë e tij dhe u drejtuan për në hotelin që kishin rezervuar.
Ai zgjodhi të kalonte autostradën A4, e cila kalon përballë aeroportit Orio al Serio. Miqtë e tij nuk e ndoqën, ndërsa ai u godit nga një makinë, duke mbetur i vdekur në çast.
Tifozi i dha frymën e fundit disa metra larg hotelit ku do të kalonte natën para se të ishte në Milano për sfidën e Champions League, ndërsa autoritetet i kanë gjetur në xhepa përveç pasaportës dhe biletën për ndeshjen e sotme.
