Sekretari i Përgjithshëm i Partisë Demokratike, Flamur Noka, i cili po koordinon grupin e protestuesve që ka bllokuar Rrugën e Elbasanit, foli sërish për mediat nga tubimi, duke u ndalur te vrasja e 14-vjeçarit Martin Cani.
Ai akuzoi Ministrinë e Shëndetësisë se po provokojnë protestuesit duke dërguar dhjetëra ambulanca përgjatë Unazës së Mesme të Tiranës, me qëllim lirimin e rrugës te kryqëzimi i Xhamisë së Namazgjasë.
Sipas tij vetëm një nga këto autoambulanca do të mjaftonte për t’i shpëtuar jetën Martin Canit pasi u godit me thikë në zemër pranë shkollës “Fan Noli”, por ajo mbërriti me vonesë dhe nuk e transportoi në QSUT, por shumë më larg, te Spitali i Traumës.
“Shikoni si ngrihet shteti për të provokuar opozitën. Me dhjetëra ambulanca për gjysmë ore. Një ambulancë duhej për Martin Canin, por jo e çuan në Spitalin Ushtarak, shikoni gjithë këto urgjenca, të gjitha te QSUT gjasme shkojnë se kjo rruga duhet liruar. Ka fytyrë më çnjerëzore se kjo e këtyre. Po Ministri e Shëndetësisë është kjo. Këta janë bandë, janë të gjithë bandë”, u shpreh Noka.
Në vijim ai akuzoi edhe policinë se ka manipuluar provat e ngjarjes ku humbi jetën 14-vjeçari Martin Cani, duke fshehur edhe bashkëpunëtorin e Mario Përlleshit, pasi prindërit e tij janë të punësuar pranë BKH dhe SPAK.
“E patë ju kjo policia e Ilir Prodës, Sokol Bizhgës dhe Neritan Nallbatit e fsahehu autorin, bashkëpunëtorin e dytë të vrasjes së Martin Canit. E fshehu sepse ishin edhe babai edhe mamaja, kontributor të mëdhenj të drejtësisë së re. Duke qenë se ishin pjesë e shtabit dhe zemrës së Rilindjes ata nuk duhet të dilte se kishin vrarë, duhej të fshihej. Kjo është fytyra e kësaj policie, te fshehja e provave të krimit, te manipulimi i provave dhe sot dua të falënderoj mediat që i nxorën të palarat. Dhe sot për të luftuar opozitën, për të ushtruar dhunë në krye të policisë vjen famëkeqi Sokol Bizhga, Neritan Nallbati, Elton Allushi, Ilir Proda, të gjithë ushtarët e komanduar”, tha Noka.
Më pas Noka ndërpreu fjalën për shkak të thirrjes së ezanit në Xhaminë e Namazgjasë.
