Kandidati për kryeministër në Serbi, Gjuro Matsut, dorëzoi në kuvend propozimin me emrat e qeverisë së re. Në përbërje vihet re mungesa e Aleksandër Vulin, i cili dukshëm është përjashtuar pas vërejtjeve të bëra nga Bashkimi Europian.
Në mesin e emrave të propozuar është edhe Demo Berisha, një shqiptar që vetëm emrin e ka të tillë. Ai pritet që të mbajë postin e ministrit për të drejtat e njeriut, minoritetet dhe për dialogun social. Demo Berisha në të kaluarën ka mohuar ekzistencën e shtetit të Kosovës, madje, sipas raportimeve të mediave, ka kërkuar që pushtuesi serb të kthehet në Kosovë. Ai thotë se ka lindur në Pejë dhe se tani jeton në Vojvodinë, megjithatë i referohet Serbisë si atdheu i tij.
Demo Berisha ka shërbyer në Forcat e Armatosura të Serbisë që nga 1982 deri në vitin 2005 kur doli në pension, dhe është dekoruar disa herë si ushtarak. Ai ka qenë vazhdimisht i angazhuar në politikë dhe shumë afër presidentit aktual serb, madje është dhe anëtar i Komitetit Nismëtar për themelimin e Lëvizjes për Popullin dhe Shtetin, që konsiderohet si partia e re e Aleksandër Vuçiç.
Për vite me radhë e ka quajtur Kosovën si “Kosova dhe Metohija” dhe pretendon se nuk është shqiptari i vetëm në serbi që mendon kështu. Për këtë arsye, thotë se ka krijuar në 2014-ën, organizatën joqeveritare në Serbi me emërtimin “Amëza e Shqiptareve në Serbi”.
Sipas një artikulli në medias “Telegrafi”, Demo Berisha, ka publikuar një revistë dhe ballinën ia kishte kushtuar 100 vjetorit të kalimit të ushtrisë serbe përgjatë Shqipërisë, i ka thurur lavde Esat Pashë Toptanit për përkrahjen që u ka bërë serbëve. Kjo duket se është edhe lidhja e tij në ideologji me Aleksandër Vulin, i cili në Francë bëri homazhe te varri i Esat Pashë Toptanit duke e quajtur një “hero të Serbisë”.
