Liderit historik të PD, Sali Berisha iu rezervua një pritje madhështore në mbylljen e fushatës të PD-ASHM në Tiranë. Kryetari i Partisë Demokratike, Prof. Dr. Sali Berisha shprehu mirënjohjen e tij të thellë për Peter Beyer, deputetin e Bundestagut, për mbështetjen e pandërprerë ndaj opozitës dhe Partisë Demokratike, duke theksuar gjithashtu rëndësinë e bashkëpunimit të ardhshëm me kancelarin Friedrich Merz. Berisha vlerësoi gjithashtu Lord Jackson nga Partia Konservatore britanike dhe Chris LaCivita, strategun e fushatës së Donald Trump, për kontributin vendimtar që ata dhanë në këtë periudhë të vështirë, duke siguruar marrëdhënie të ngushta dhe të forta me administratat e ardhshme të Gjermanisë, Britanisë dhe Shteteve të Bashkuara të Amerikës.
Në një atmosferë elektrizuese dhe plot shpresë, me qytetarët që besojnë në një të ardhme më të ndritur. Kryetari i PD premtoi se brenda 100 ditëve të para të qeverisjes, Partia Demokratike do të ndërtojë themelet për realizimin e ëndrrës shqiptare të rinisë, me masa konkrete që do të përmirësojnë ndjeshëm kushte jetese dhe mundësitë për të rinjtë, përfshirë rritjen e pensioneve (minimumi 200 euro), dyfishimin e fondeve për arsimin, heqjen e mesatares për universitet, punësim të garantuar për të diplomuarit dhe mbështetje të madhe për sipërmarrësit e rinj përmes fondit “Startup Albania”.
Lideri Opozitar, Sali Berisha gjithashtu premtoi mbështetje financiare për çiftet e reja dhe familjet, duke siguruar fonde për strehimin dhe ndihmë për rritjen e fëmijëve. Berisha e theksoi 11 Majin si një moment vendimtar, jo vetëm për Partinë Demokratike, por për çdo qytetar shqiptar, për dinjitetin dhe për të ardhmen e vendit.
Në fjalimin e tij, Berisha iu drejtua edhe ish-pronarëve dhe ish-të përndjekurve politikë, duke u shprehur për mirënjohjen më të thellë për sakrificat e tyre dhe duke kërkuar falje për ndonjë gabim të mundshëm të Partisë Demokratike në trajtimin e tyre. Kryetari i PD tha se do të shlyejë borxhin moral dhe shoqëror ndaj këtyre grupeve brenda një mandati dhe premtoi se do të anulojnë çdo ligj të miratuar nga qeveria e Edi Ramës që ka dëmtuar pronat dhe të drejtat e shqiptarëve.
Lideri demokrat, Sali Berisha e cilësoi 11 Majin si një ditë të rëndësishme dhe historike për Shqipërinë, duke theksuar se ky është një moment për të vendosur për të ardhmen e vendit dhe për të realizuar një Shqipëri të re, të begatë dhe të integruar në Bashkimin Europian. Ai akuzoi ashpër qeverisjen aktuale për pasojat e saj negative dhe premtoi një Shqipëri që do të ecë përpara drejt një të ardhmeje më të mirë për çdo shqiptar, me një qeverisje që përqendrohet te mirëqenia, punësimi, zhvillimi ekonomik dhe fuqizimi i arsimit.
Në përfundim të fjalës së tij, Kryetari i PD, Sali Berisha bëri thirrje për bashkim dhe angazhim të çdo shqiptari për një Shqipëri më të fortë, më të zhvilluar dhe më të fuqishme, që do të realizojë ëndrrat dhe aspiratat e rinisë shqiptare.
FJALA E PLOTË
Të dashur qytetare dhe qytetarë të Tiranës dhe mbarë Shqipërisë.
Vëllezër dhe motra, zonja dhe zotërinj.
Përshëndetjet e mia më të përzemërta ju që keni mbushur këtë bulevard, qytetarëve të Tiranës dhe mbarë Shqipërisë, vëllezërve dhe motrave tona në diasporë kudo që ndodhen donte, mirënjohjen më të pakufishme.
Të dashur miq të nderuar dhe të çmuar tanë, të pranishëm në këtë mbyllje madhështore të fushatës tonë.
Në emër tuaj, unë do i përcjell përshëndetjet më të përzemërta deputetit të Bundestagut gjerman, mikut të ditëve më të vështira të PD, opozitës shqiptare, Peter Beyer, i cili vjen sot këtu për të mbështetur fitoren e opozitës shqiptare dhe PD-në.
I nderuar zoti Beyer, mbetemi përjetë mirënjohës ndaj mbështetjes tuaj, por unë shfrytëzoj rastin tim nga kjo tribunë t’i përcjell përshëndetjet më të përzemërta kancelarit Friedrich Merz, të cilin pata rastin ta përshëndes në Valencia, dhe ta siguroj se për PD-në dhe opozitën shqiptare, fitorja e CDU-së, zgjedhja e kancelarit Merz në krye të ekzekutivit gjerman, në udhëheqje të Gjermanisë dhe Europës, konsiderohet një fat i madh, një vendim historik për Gjermaninë dhe Europën.
Siguroj se PD në qeveri do vendosë bashkëpunimin më të ngushtë me qeverinë e kancelarit Merz për rivendosjen e shtetit ligjor, ligjit, funksionimin e ekonomisë së tregut, për shndërrimin e Shqipërisë në një eksportues të mirash materiale, mallrash Made in Albania në Gjermani dhe Europë, dhe jo krim e refugjatë, siç është sot.
I dashur Lord Jackson, jemi jashtëzakonisht të nderuar me praninë tuaj këtu. Ardhja juaj në mbështetje të opozitës shqiptare dhe PD, është një ndihmë e çmuar, por është gjithashtu i një tradite të kahershme të bashkëpunimit të shkëlqyer të PD që në themelimin e saj dhe Partisë Konservatore të Britanisë së Madhe.
U siguroj se PD në pushtet do të konsolidojë gjithnjë e më shumë lidhjet dhe bashkëpunimin me Partinë Konservatore dhe vendin tuaj mik.
I dashur zoti Chris LaCivita, arkitekt i rikthimit më të madh në historinë e njerëzimit me votën e lirë, rikthimit të presidentit Donald Trump në Shtëpinë e Bardhë, mirënjohjen më të pakufishme ju për vendimin që morët të angazhoheni me të gjithë potencialin tuaj për rikthimin e PD-së dhe Sali Berishës në pushtet.
Emri juaj, ekspertiza juaj, u shndërrua me shpejtësi në eliksirin e kësaj fushate, në shpirtin e fitores së saj.
Ditën e parë, me konferencën e parë të shtypit, e shkallmove Edi Ramën duke i rënë tavolinës me grushta.
Do garantoj se nesër në mëngjes do i bjerë me kokë tavolinës.
Por i meriton të gjitha, ne jemi mirënjohës pafundësisht për vendimin që more për të na ndihmuar në një moment kritik për opozitën dhe Shqipërinë.
Dhe u garantojmë se PD në pushtet do të vendosë marrëdhëniet më miqësore, bashkëpunimin më të ngushtë me administratën e presidentit Donald Trump në të gjitha fushat.
Miqtë e mi, secili prej jush, qindra mijëra të tjera opozitare e opozitarë që nuk janë këtu sot, meritojnë një mirënjohje të pakufishme pasi ju me energjitë tuaja, me guximin tuaj, me entuziazmin tuaj, mbollët në një muaj rresht në të katër anët e Shqipërisë filizat e shpresës, dritën e fitores në zemrën dhe mendjen e të gjithë shqiptarëve.
Ju arritët me përkushtimin tuaj, me fisnikërinë tuaj, me përulësinë tuaj, të fitoni zemrat dhe mendjen e qindra mijëra shqiptarëve.
Ju bëtë të pabesueshmen, të besueshme, irealen, reale, ju mblidheni sot në prag të një fitoreje madhështore.
Sot vetëm një ditë na ndan nga 11 Maji, dita e vendimit më të rëndësishëm që ne shqiptarët e të gjitha gjenerateve, kemi marrë dhe do marrim në jetën tonë.
Ditën e vendimit me të cilin ne na jepet shansi për të shpëtuar Shqipërinë, për të shpëtuar sqiptarët, nga kjo diktaturë që e shkretëtoi atë, që e varfëroi atë, që e izoloi atë më shumë se çdo regjim tjetër në kohëra.
Ndaj dhe sot, këtu para jush unë dua t’u bëj një thirrje qindra e mijëra burrave dhe grave fisnikë, flokëthinjurve që shkrinë jetën e tyre për Shqipërinë, bashkohuni me datën 11 Maj, votoni ndryshimin sepse vota juaj do të jetë para së gjithash votë për dinjitetin tuaj.
Sepse vota juaj do të jetë gjithashtu votë për të ndëshkuar ata të pamëshirë që në mënyrën më çnjerëzore u përçmuan ju, u poshtëruan ju, u detyruan ju njerëz fisnikë të qani me lot të ftohta mjerimi.
Jo, më 11 Maj, ju votoni që brenda 100 ditëve, Shqipëria të mos ketë pension nën 200 euro. Edhe njëherë, 560 mijë burra dhe gra që sot kanë një pension nën 172 euro, brenda 100 ditëve do kenë pensionin 200 euro.
Të gjithë pensionistëve të tjerë, do u rritet pensioni 20 përqind.
Dhe u garantoj se ky vrap nuk ndalet gjersa ju, burra dhe gra fisnikë të paguheni më mirë se të gjithë pensionistët e rajonit.
Vendi juaj, me djersën tuaj, është më i pasuri në rajon dhe ju e meritoni atë.
Të rinj dhe të reja, ju që votoni me datën 11 për herë të parë, keni një fat të bardhë.
Po të gjithë ju të tjerët që shkoni me 11 Maj, vota juaj ka peshën e jetës tuaj, ka peshën e të ardhmes tuaj, ka peshën e ëndrrës tuaj të bukur.
Në 100 ditët ne hedhim bazat që çdo i ri dhe e re, të mendojë, të realizojë ëndrrën shqiptare në Shqipëri.
Zotimi ynë solemn është se do dyfishohen fondet për arsimin.
Shkollat tuaja do modernizohen dhe se ju, se asnjë fëmijë nuk do mbetet analfabet.
Se asnjë fëmijë nuk do mbetet pa shkollën e mesme.
Asnjë mesatare nuk do ketë për ju në universitete.
Shkollimi dhe punësimi juaj është zotimi ynë solemn.
Të dashur të rinj dhe të reja, mos harroni kurrë se me 11 Maj vota është edhe për dinjitetin tuaj.
Ju jeni të rinj dinjitozë, ju e dëgjuat me veshët tuaj kur një njeri i shfazuar, kur një njeri i dezekuilibruar, u tha se për mandatin e katërt do u sigurojmë dy kile farë kungulli në një fyerje të madhe për të rinjtë dhe të rejat shqiptare.
Qeveria e ardhshme do shpallë paktin për rininë.
Qeveria e ardhshme do paktin Startup Albania.
Çdo i ri do punësohet brenda vitit pas diplomimit në ndërmarrje private apo publike.
Me fondin e Startup Albania çdo i ri do përfitojë 5 mijë euro grant.
Çdo sipërmarrës që do u punësojë ju do ketë zbritje 70 përqind në taksa.
Ju një gjë mos e harroni, se beteja e jetës sonë është të sjellim kombin në rininë e tij.
Ndaj dhe për talentet tuaja do ketë një fond të veçantë me të cilin do mbështeteni për të gjithë krijimtaritë tuaja, në art, në shkencë, në sport, në të gjitha fushat.
Sot, njeriu që u afroi ju 2 kg fare kungulli, u ofron ju një apartament për 108 vjet punë.
U garantojmë se çdo çift i ri do ketë një çati.
30 mijë euro për të paguar interesat e kredisë.
70 euro për bebin e parë. 60 euro për bebin e dytë.
Për të tretin, pagesa e qeverisë nga lindja gjer në 23 vjeç.
Ky program, që në fakt edhe njëherë, moton më kryesore ka kombi në rininë e tij, fton çdo shqiptar kudo që ndodhet, në të katër anët e botës, të konsiderojë kthimin në Shqipëri.
5 vite pa taksa.
Kredi të buta.
Suksesi i tyre është prova jonë.
Të dashur miq, beteja për të ndërtuar Shqipërinë Madhështore është betejë për ëndrrën e rinisë shqiptare.
Shqipëria Madhështore do jetë vetëm Shqipëria që kap trenin e teknologjisë së lartë.
U garantoj se Shqipëria do jetë Shqipëria e hightech-ut, e internetit 3, dataqendrave dhe inteligjencës artificiale.
Kjo do jetë Shqipëria në moshën tuaj.
Por unë i premtoj çdo biznesmeni dhe i them se 11 Maji nuk është një votë për një qeveri, por është një votë para se gjithash për biznesin tuaj.
Sepse në qoftë se ti në këto vite ke mbijetuar, pas 11 Majit, hapësirat e lirisë për ty do jenë krejtësisht tjera.
Ne jemi parti e lirisë së individit, ne besojmë tek iniciativa e lirë.
Ndaj do vendosim regjimin e taksave më të ulëta në Europë.
Ronald Reagan shkruante se paratë në kontot e qytetarëve dhe binesmenëve janë më të dobishme se llogaritë e qeverisë.
Unë u them se kjo profeci e tij është biblike, është kuranike.
Ndaj dhe çdo biznes i vogël do e blejë energjinë nga 18 në 6 lekë.
Do përgjysmohet tarifa e ujit.
Sipërfaqja publike do pjesëtohet me 5.
Bashkitë nuk do mund të tatojnë kurrë më shumë se 1 përqind të xhiros.
Tavanet e tatim fitimit dhe TVSH-së do shkojnë 180 mijë euro.
Bizneset e tjera do e kenë tatim fitimin 10 përqind.
TVSH-në 15 përqind.
Kjo do të thotë më shumë vende pune, më shumë rroga, më shumë mirëqenie.
Po pse ai, po pse gjeniu që shkroi doktrinën e kapitalizmit, thoshte se pasuria përhapet, përhapet dhe përhapet. Pasuria përhapet kur ti respekton lirinë e individit, krijon hapësirë për individin dhe bizneset e tij.
Nuk do ketë vend tjetër që të ketë taksat e ulëta si Shqipëria.
Biznesmenë, investitorë nga SHBA, Gjermania, Franca, Greqia, do vërshojnë drejt Shqipërisë.
Shqipëria do jetë vendi më tërheqës.
Katër zona të lira ekonomike do krijojmë.
Made in Albania, krenari kombëtare.
Miq, fermerët shqiptarë, të përçmuar dhe të diskriminuar, njerëz fisnikë, që me lumenj djerse nxjerrin jetën e tyre, patën këto 12 vite kohën më të vështirë pas kolektivizimit.
Ballkani i Hapur ishte një akt armiqësor ndaj fermerëve shqiptarë. Argati i Vuçiçit hapi dyert për mallrat që vinin nga Rusia, nga të gjitha hapësirat e tjera, dhe fermerët u përballën me një pabarazi ekstreme.
Vetëm në Kosovë dhe Maqedoni, fermerët subvencionohen pesë herë më shumë se në Shqipëri.
Të dashur fermerë dhe fermere, më 11 Maj votoni se votoni në radhë të parë për djersën tuaj, mundin tuaj, fermën tuaj, mirëqenien tuaj.
Sepse programi ynë në 100 ditët e para do pesëfishojë subvencionet për çdo fidan të mbjellë, për çdo kokë bagëti, për çdo njësi prodhimi.
Dhe në fshat nuk do ketë më diskriminim. Nuk do ketë pension nën 200 euro.
Një mesazh kam për ish-pronarët dhe ish-të përndjekurit politikë.
Duke u shprehur nderimin më të madh, por edhe ndjesë për gabimet që kjo parti ka bërë në ligje të caktuara, u jap fjalën e nderit se detyrimin që shoqëria shqiptare ndaj tyre, Sali Berisha e kërkon borxhin e nderit të tij.
Dhe ai borxh do shlyhet brenda një mandati.
Ai është borxh dhe vetëm borxh.
Dhe shoqëria nuk do u rrijë më asnjë ditë më shumë se mandatin e parë.
Do i japim përgjigjen përfundimtare pronës.
Do anulojmë të gjithë ligjet e sotme të Edi Ramës që grabit, plaçkit pronat si në vitin 1946.
Paralajmëroj ministrat strategjikë, a e morët vesh o miq, se pas Xhaçkës strategjike, doli Ibrahimi strategjike.
Këta një dhe dy, bëjnë burrat strategjikë.
Do ua marrim të gjitha ato prona dhe do u jepen pronarëve.
Mos guxoni të prekni pronat e shqiptarëve.
Pra miq, 11 Maji në të vërtetë është ditë e çdo shqiptari.
Është ora e çdo shqiptari.
Është ora e Shqipërisë.
Është ora e atdhetarisë së shqiptarëve.
A e shihni ju ku kemi rënë?
Kemi rënë në kombin që kemi sot treguesin e lindshmërisë më të ulët në botë.
Kemi rënë në kombin që sot kemi treguesin e jetesës më të keqin në Europë.
Kemi rënë në kombin e vetëm që ka një vend që quhet kanabistan apo Kolumbi e Europës.
Miq, më 11 Maj firmosim së bashku për një Shqipëri krenare, për një Shqipëri tjetër.
Ne që përmbysim dikur një diktaturë, ne do përmbysim këtë diktaturë.
Ne që anëtarësuam Shqipërinë në NATO, do anëtarësojmë Shqipërinë në BE.
Ne që dolëm nga honet e mjerimit në grupin e vendeve me të ardhura të mesme të larta, do ecim drejt mirëqenies, punësimit, rrogave të larta, drejt shkollimit.
Ndaj dhe këto orë që na ndajnë, le ta bëjmë natën ditë, të vazhdojmë komunikimi, kontaktet, bisedat me çdo të njohur kudo që është.
T’i ftojmë të bashkohen.
Nuk është çështja për partitë, nuk është çështja për pushtetin e Sali Berishës.
Absolutisht jo.
Por është çështja për të ardhmen e Shqipërisë dhe shqiptarëve.
Për mirëqenien.
Për begatinë.
Për punësimin.
Për rroga të larta.
Për pensione të larta.
Për shkollimin e të rinjve.
Për ëndrrën e të rinjve në Shqipëri.
Është çështja për rininë në Europë.
Është çështja për Shqipërinë zonjë.
Rroftë Shqipëria, fitore, fitore, fitore!
