David Beckham është nderuar zyrtarisht me titullin kalorës në Listën e Nderimeve të Ditëlindjes së Mbretit, pas më shumë se një dekade pritjeje.
Ish-kapiteni i Anglisë, tashmë Sir David Beckham, u vlerësua për kontributin e tij në sport dhe bamirësi.
Mes urimeve të shumta, vëmendje të veçantë mori dedikimi i bashkëshortes së tij, Victoria Beckham, e cila në një postim emocionues në Instagram shkroi: “Ti gjithmonë ke qenë kalorësi im me armaturë të shkëlqyeshme – por tani është zyrtare. Sir David! Nuk mund të jem më krenare për ty”, shkruan DailyMail.
Ajo shtoi se përkushtimi i tij ndaj familjes, punës dhe njerëzve që ka ndihmuar gjatë viteve, është burim frymëzimi për të gjithë.
“Jam shumë krenare që të quaj timin. Të dua shumë”, përfundoi ajo.
Beckham e pranoi titullin me përulësi, duke thënë se “kurrë nuk do ta kishte imagjinuar një nder të tillë”, ndërsa e konsideroi kapitenin e Anglisë si privilegjin më të madh të karrierës së tij.
Ky nder vjen pas shumë përpjekjesh dhe vonesash, përfshirë një “flamur të kuq” nga taksat që e kishte penguar më parë në vitin 2014.
Sot, me nderimin si Sir, ai i shtohet një liste të gjatë personalitetesh të njohura që janë vlerësuar për ndikimin e tyre në shoqëri.
