Një protestë e mbajtur në Westminster në mbështetje të grupit “Palestine Action” ka çuar në arrestimin e 29 personave nga Policia Metropolitane e Londrës, nën dyshimet për shkelje të Ligjit për Terrorizmin.
Protestuesit, të cilët mbanin pankarta me mesazhe si “Kundërshtoj gjenocidin, mbështes Palestinën”, u mblodhën pranë sheshit të Parlamentit, por përfunduan të rrethuar nga forcat e rendit. Disa prej tyre, përfshirë një grua e cila u pa duke u shoqëruar me pranga, u ndaluan menjëherë.
Nga e shtuna, 5 korrik, “Palestine Action” është shpallur zyrtarisht organizatë terroriste në Mbretërinë e Bashkuar, pas një vendimi të Gjykatës së Lartë. Tashmë, çdo formë mbështetjeje publike për grupin konsiderohet vepër penale, që mund të dënohet deri në 14 vite burg.
Qeveria britanike ndërmori këtë hap pas dëmeve që grupi shkaktoi muajin e kaluar në bazën ajrore RAF Brize Norton, ku dy avionë ushtarakë u dëmtuan, me një kosto prej 7 milionë paundësh.
Ministrja e Brendshme Yvette Cooper e quajti veprimin “të turpshëm” dhe theksoi se grupi ka një histori të gjatë veprash kriminale të pajustifikueshme.
“Palestine Action”, që është fokusuar në sulme ndaj kompanive të armëve, ka qenë veçanërisht aktive që prej shpërthimit të luftës në Gaza. Ndërkohë, Gjykata Ndërkombëtare e Drejtësisë po shqyrton akuzat për gjenocid ndaj Izraelit, të cilat ky i fundit i mohon kategorikisht.
Grupi “Defend Our Juries”, i cili paralajmëroi protestën, reagoi me ironi pas arrestimeve duke thënë: “Është ngushëlluese të mendosh që policia e antiterrorit nuk ka asgjë më të rëndësishme për të bërë.”
