Papunësia në Gjermani ka kaluar shifrën e tre milionëve për herë të parë pas më shumë se një dekade. Sipas Agjencisë Federale të Punësimit, në gusht numri i të papunëve arriti në 3.025 milionë, që është 46 mijë më shumë se një muaj më parë dhe 153 mijë më shumë se në gusht 2024. Shkalla e papunësisë u rrit në 6,4%.
Ekspertët theksojnë se situata mbetet pasojë e stanjacionit ekonomik, por vërehen edhe shenja të para stabilizimi. Ndërkohë, dallimet rajonale mbeten të mëdha: në Bremen dhe Berlin shkalla e papunësisë është mbi 10%, ndërsa në Bavari dhe Baden-Württemberg nën 5%.
Presidenti i Konfederatës së Punëdhënësve, Rainer Dulger, e quajti këtë zhvillim “pasojë të refuzimit për reforma” dhe kërkoi një valë të re reformash këtë vjeshtë.
Megjithë shifrat e larta, Instituti për Kërkime të Tregut të Punës (IAB) parashikon ndaljen e rritjes së papunësisë dhe mundësinë që punësimi të rifitojë vrull muajt në vijim.
