Nga data 12 tetor do të nisë zbatimi i sistemit të ri të hyrje/daljeve në 29 vendet e zonës Schengen.
Lajmi është bërë me dije nga Ministrja e Punëve të Brendshme, Albana Koçiu e cila sqaron se ky sistem do të regjistrojë automatikisht të dhënat nga dokumenti i udhëtimit, datat e mbërritjes dhe largimit, si dhe të dhënat biometrike (shenjat e gishtave dhe imazhin e fytyrës).
Koçiu sqaron se nga ana e qytetarëve nuk kërkohet asnjë veprim, qoftë plotësim formulari, apo aplikimi, para udhëtimit.
“Nga 12 tetori 2025, në të gjitha pikat kufitare të zonës Schengen nis zbatimin Sistemi i ri i Hyrje/Daljeve (EES)”, shkruan Koçiu nw rrjetin social X.
EES është një sistem i automatizuar i teknologjisë së informacionit që regjistron të dhënat e udhëtarëve nga vende jo anëtare të BE-së që kalojnë kufijtë e jashtëm të zonës Shengen për qëndrime afatshkurtra. Në vend të vulave, sistemi do të përdorë gjurmët e gishtërinjve, fotografi të fytyrës dhe datat e hyrjes dhe daljes.
Sistemi EES synon të modernizojë kontrollet kufitare duke i bërë ato më të shpejta dhe më efikase. Udhëtarët do të përfitojnë nga opsionet e vetëshërbimit dhe aplikacionet mobile, duke kaluar më shpejt kufijtë. Gjithashtu, sistemi ndihmon në parandalimin e migracionit të parregullt dhe rrit sigurinë në zonën Shengen përmes identifikimit të saktë të udhëtarëve. EES do të zbatohet gradualisht dhe pritet të jetë plotësisht funksional deri më 10 prill 2026. Në fazat e para, mund të ketë vonesa dhe radhë më të gjata në kufi, por sistemi synon të thjeshtojë procesin në afat të gjatë.
Sistemi do të pilotohet në 29 vende të zonës Shengen, përfshirë Austrinë, Belgjikën, Francën, Gjermaninë, Greqinë, Italinë, Spanjën, Zvicrën, Suedinë, Norvegjinë dhe të tjera. Irlanda dhe Qiproja nuk do ta përdorin sistemin për momentin dhe do të vazhdojnë me përpunimin manual të pasaportave.
