Bashkimi Evropian ka filluar zyrtarisht hartimin e paketës së 20-të të sanksioneve kundër Rusisë për shkak të luftës së vazhdueshme të agresionit ndaj Ukrainës.
Këtë e ka konfirmuar Ministria e Financave e Lituanisë pas takimit të 7 nëntorit mes ministrit të Financave Kristupas Vaitekunas dhe Komisioneres Evropiane për Shërbime Financiare dhe Unionin e Kursimeve e Investimeve, Maria Luís Albuquerque.
“BE-ja ka nisur draftimin e paketës së ardhshme, të 20-të, të sanksioneve kundër Rusisë për shkak të luftës së saj të agresionit ndaj Ukrainës”, thuhet në deklaratë.
Vaitekunas theksoi nevojën për të forcuar masat edhe kundër Bjellorusisë, duke i barazuar ato me sanksionet ndaj Rusisë dhe duke shtuar kufizime të reja, sidomos për shkak të “sulmeve hibride të rregullta” nga Minsku.
Komisionerja Albuquerque sqaroi se procesi për masa të reja ndaj Bjellorusisë është në fazë të hershme, por shtoi: “Po punojmë me vende të treta, sepse disa prej tyre po lehtësojnë anashkalimin e sanksioneve.”
Paketa e 19-të u miratua në fund të tetorit, por Lituania kërkon që presioni të rritet menjëherë në sektorët e energjisë dhe financave ruse.
Ky zhvillim vjen në një moment kur BE-ja po koordinon me partnerët ndërkombëtarë për të mbyllur të gjitha vrimat e anashkalimit dhe për të dobësuar makinerinë e luftës së Kremlinit.
